Փաստ ինֆո

Լոռու մարզի ընդհանուր իրավասության առաջին ատյանի դատարանում շարունակվում է առանց իրացնելու նպատակի թմրամիջոցների կամ հոգեմետ նյութերի ապօրինի շրջանառությանն օժանդակելու մեջ մեղադրվող վանաձորցի Աշոտ Էվոյանի դատաքննությունը:

Թերթը գրում է, որ գործը քննվում է «Վանաձոր» ՔԿՀ-ի դատապարտյալ Վալերիկ Հովսեփյանին առաջադրված մեղադրանքի շրջանակներում:

Ըստ մեղադրական եզրակացության` Վ. Հովսեփյանն առանց իրացնելու նպատակի թմրամիջոց ապօրինի ձեռք բերելու նպատակով 2011թ. իր ծանոթ, Երևան քաղաքի բնակիչ Գ. Պողոսյանին հանձնարարել է ինքնությունը չպարզված անձից վերցնել 5.864 գրամ «ացետիլացված ափիոն» և ուղարկել Վանաձոր: Վ. Հովսեփյանի հանձնարարությամբ վերջինիս կնոջ եղբայրը` Վ. Հովհաննիսյանը, թմրամիջոցը ստացել և փոխանցել է Ա. Էվոյանին, ով նշված թմրամիջոցը թաքցրել է քաբաբի մեջ, այն դրել իր ընկերոջ` «Վանաձոր» ՔԿՀ-ի կալանավոր Վ. Բաղդասարյանի հարազատների կողմից իրեն տրված հանձնուքի մեջ և փորձել ապօրինի իրացնել «Վանաձոր» ՔԿՀ-ում: Սակայն ՔԿՀ աշխատակիցների կողմից թմրանյութը հայտնաբերվել և առգրավվել է:

Սակայն Ա. Էվոյանի պաշտպան Գուրգեն Հարությունյանը թերթի թղթակցի հետ զրույցում նշել է, որ իր պաշտպանյալը տեղյակ չի եղել թմրամիջոցի մասին: Ըստ նրա` այդ են վկայում նաև վկաների տված ցուցմուքները: Փաստաբանը նաև ասել է, որ նախաքննության փուլում տեղ են գտել խախտումներ, որ քննիչը առանց պաշտպանական կողմին տեղյակ պահելու, քրեական գործը գաղտնի ուղարկել է Լոռու մարզի դատախազություն, որտեղ էլ այն հաստատվել և ուղարկվել է դատարան: Պաշտպանական կողմը գործի նյութերին ծանոթացել է, երբ այն արդեն դատական քննության էր ենթակա:

«Այս կարգի խախտումներով էլ գործը շարունակում է քննվել»,- ասել է փաստաբան Գ. Հարությունյանը: