Փաստ ինֆո

Ազգային ժողովը փետրվարի 4-ին առաջին ընթերցմամբ քննարկեց կառավարության հեղինակած` «Դատախազության մասին», «Հայաստանի Հանրապետության Նախագահի, Ազգային ժողովի պատգամավորների, վարչապետի, կառավարության անդամների, Սահմանադրական դատարանի անդամների, վերահսկիչ պալատի նախագահի և դատավորների կողմից իրենց պաշտոնեական պարտականությունները կատարելիս կամ դրանք կատարելու առնչությամբ զոհվելու կամ աշխատունակությունը լրիվ կորցնելու դեպքում նրանց ընտանիքների անդամների սոցիալական պաշտպանության մասին», «Սահմանադրական դատարանի մասին», «Հայաստանի Հանրապետության Նախագահի վարձատրության, սպասարկման և անվտանգության ապահովման մասին» օրենքներում փոփոխություններ և լրացումներ կատարելու մասին օրենսդրական փաթեթը:

Ինչպես նշեց հիմնական զեկուցող` ՀՀ աշխատանքի և սոցիալական հարցերի նախարար Արտեմ Ասատրյանը, փոփոխությունները պայմանավորված են 2013 թ.-ի հունվարի 1-ից գործողության մեջ դրված «Եկամտային հարկի մասին» օրենքով:

Տվյալ կատեգորիաների անձանց կենսաթոշակները հաշվարկվում են աշխատավարձից: «Եկամտային հարկի մասին» օրենքի համաձայն, այդ անձանց աշխատավարձերը բարձրացել են եկամտահարկի և պարտադիր սոցիալական ապահովության վճարի չափով: Կենսաթոշակների (հավելավճարի) չափերի մեխանիկական աճ թույլ չտալու նպատակով կառավարությունն առաջարկում է ներկայացվող նախագծերով սահմանել, որ այդ կատեգորիաների անձանց կենսաթոշակները հաշվարկելու համար հիմք է հանդիսանում աշխատավարձի և զրո ամբողջ ինը տասնորդական գործակցի արտադրյալի չափը:

Առաջարկվում է լրացուցիչ ամրագրել, որ ՀՀ Նախագահի` օրենքով սահմանված աշխատավարձի չափը բարձրանալու դեպքում ՀՀ պաշտոնաթող Նախագահի կենսաթոշակը համամասնորեն վերահաշվարկվում է:

Բոլոր այս կատեգորիաների անձանց համար սահմանվում է, որ մինչ այժմ նշանակված կենսաթոշակները վերահաշվարկվում են այս օրենքն ուժի մեջ մտնելուց հետո սահմանված կարգով: Եթե վերահաշվարկված կենսաթոշակի չափը ցածր լինի մինչև այս օրենքն ուժի մեջ մտնելը նշանակված կենսաթոշակի չափից, ապա կենսաթոշակը կվճարվի նախկին չափով: