Փաստ ինֆո

ՀՀ կառավարությունն առաջարկում է Հայրենական մեծ պատերազմի հաշմանդամ համարել նաև ծառայողական պարտականությունները կատարելիս վիրավորվելու, կոնտուզիաների և  ստացած վնասվածքների հետևանքով հաշմանդամ դարձած նախկին ԽՍՀՄ ներքին գործերի ու պետական անվտանգության մարմինների ղեկավար և շարքային կազմի անձանց:

Հայաստանի Հանրապետությունում նրանց թիվը 20 է:

Այս մասին Ազգային ժողովի փետրվարի 4-ի նիստում հայտնեց ՀՀ աշխատանքի և սոցիալական հարցերի նախարար Արտեմ Ասատրյանը` ներկայացնելով «Հայրենական մեծ պատերազմի վետերանների մասին» օրենքում լրացում նախատեսող օրինագիծը:

Ըստ նախարարի, տվյալ անձինք ՀՄՊ վետերան համարվելու դեպքում կստանան ամենամսյա պատվովճար, ինչը մասամբ կբարելավի նրանց սոցիալական վիճակը:

Նշվեց նաև, որ նախագծի ընդունումը բխում է  ՀՄՊ վետերանների սոցիալ-իրավական պաշտպանության հարցերը  լուծելու և ազգային օրենսդրությունը աստիճանաբար ԱՊՀ միջպետական համաձայնագրերի, մասնավորապես`  1994թ. ապրիլի 15-ին կնքված «Հայրենական մեծ պատերազմի մասնակիցների և հաշմանդամների, այլ պետությունների տարածքում մարտական գործողությունների մասնակիցների, զոհված զինծառայողների ընտանիքների արտոնությունների և երաշխիքների փոխադարձ ճանաչման մասին», պահանջներին համապատասխանեցնելու անհրաժեշտությունից:

Համաձայն «Հայրենական մեծ պատերազմի վետերանների մասին» օրենքի 2-րդ հոդվածի, ՀՄՊ վետերան են համարվում ՀՀ այն քաղաքացիներն ու ՀՀ-ում մշտապես բնակվող այն անձինք, ովքեր մասնակցել են Հայրենական մեծ պատերազմին, ինչպես նաև պատերազմի տարիներին Լենինգրադի բլոկադայի մասնակիցները և ֆաշիստական համակենտրոնացման ճամբարների նախկին անչափահաս գերիները: Նույն օրենքի 3-րդ հոդվածում ամրագրված է, որ եթե ՀՀ միջազգային պայմանագրերով սահմանված են այլ նորմեր, քան նախատեսված են սույն օրենքով, ապա գործում են միջազգային պայմանագրերի նորմերը:

ԱՊՀ միջպետական համաձայնագրերով Հայրենական մեծ պատերազմի մասնակից կամ հաշմանդամ  համարվող այլ կատեգորիաների պատկանող անձինք մեր հանրապետությունում օգտվում են համաձայնագրերում ամրագրված արտոնություններից և սոցիալական երաշխիքներից, չեն օգտվում միայն «Հայրենական մեծ պատերազմի վետերանների մասին» օրենքով ՀՄՊ մասնակիցների համար սահմանված ամենամսյա պատվովճարից:

Գործող օրենսդրության համաձայն, Հայրենական մեծ պատերազմի մասնակիցներն օգտվում են 8 000 դրամ, իսկ հաշմանդամ վետերանները,  կախված հաշմանդամության խմբից, 18 000-27 000 դրամ ամենամսյա դրամական օգնություն ստանալու իրավունքից` նախկինում ունեցած տրանսպորտային անվճար սպասարկման, էլեկտրաէներգիայի, գազի, ջերմամատակարարման, ջրամատակարարման և ջրահեռացման վարձավճարների 50 տոկոս զեղչի  դիմաց:

Հաշմանդամ վետերաններն օգտվում են աղբահանության, հեռախոսի և ռադիոյի բաժանորդային վարձը 50 տոկոս զեղչով վճարելու, վետերանները` ԱՊՀ երկրների տարածքում տարին մեկ անգամ /կտրոնով, երկկողմանի կարգով/ արտոնյալ պայմաններով երթևեկելու, պետպատվերի շրջանակում անվճար բուժօգնություն, այդ թվում` դեղորայք, պրոթեզաօրթոպեդիկ և վերականգնողական պարագաներ ստանալու, 25 000 դրամ ամենամսյա պատվովճար ստանալու իրավունքից:

Բացի այդ, Հայրենական մեծ պատերազմի հաղթանակի 65-ամյակի կապակցությամբ, ՀՀ կառավարության որոշմամբ,  Հայրենական մեծ պատերազմի վետերաններին  տրվել է նաև քաղաքային տրանսպորտից անվճար երթևեկելու արտոնություն:

Լուսանկարը` ըստ Ֆոտոլուրի