Փաստ ինֆո

«Pastinfo.am»-ի թղթակցի հարցազրույցը Քայքայիչ պաշտամունքից տուժածների վերականգնողական և օգնության կենտրոնի նախագահ Ալեքսանդր Ամարյանի հետ:

Հարց - Ի՞նչ որակումներ կտայիք Պարույր Հայրիկյանի դեմ կազմակերպված մահափորձին: Ու՞մ կարող էր այս ամենը ձեռնտու լինել:

Ա. Ամարյան - Հին հռոմեական իրավագիտության նորմերով տեղի ունեցած դեպքի հետազոտման առաջնային հարցը հենց այդ էր` ու՞մ է այն ձեռնտու:

Այսօր շատերը կարծիքներ են արտահայտում, որ ստեղծված այս ամբողջ իրավիճակը կարող էր ձեռնտու լինել հենց իրեն` Պարույր Հայրիկյանին: Սակայն ես կարծում եմ, որ դա սխալ հարցադրում է: Այն չէր կարող ձեռնտու լինել, ոչ մահափորձի զոհ դարձած ՀՀ նախագահի թեկնածուին, ոչ էլ իշխանամետ կողմին` Հանրապետական կուսակցությանը: Դրա համար կարող է հիմնավորում լինել թեկուզ այն փաստը, որ մեր վերջին վիճակագրության տվյալներով Հայրիկյանը կարող էր հավաքել ձայների 1-2 տոկոսը, որը որևէ ազդեցություն չէր կարող թողնել ՀՀ նախագահական ընտրությունների արդյունքների վրա: Եվ հետո, Հայրիկյանն այն մարդը և քաղաքական գործիչը չէ, որ մտներ նման խաղերի մեջ: Բայց, միաժամանակ, ասեմ որ այդ հրեշավոր ծրագիրը թե ում կարող էր ձեռնտու լինել, այնուամենայնիվ, ենթակա է որոշակի դեդուկցիայի:

Առաջին վարկածը, որ ձևավորվում է այս դեպքից ածանցվող համապատասխան տրամաբանության արդյունքում, այն է, որ փետրվարի 18-ին նշանակված ընտրությունները տեղաշարժվեն, հետաձգվեն:

Մենք բոլորս հիշում ենք 2008թ.-ի մարտի 1-ի դեպքերը: Եթե դիտարկում ենք փետրվարի 18-ից հետո սահմանադրությամբ նախատեսված երկշաբաթյա հետաձգումը, ապա կտեսնենք, որ մոտենում ենք մարտի 1-ի դեպքերի ժամանակ մահացածների թաղման 5-ամյա տարելիցին: Այս դեպքում չի բացառվում, որ այդ օրը ինչ-որ մի միջոցառում կատարվի, որի արդյունքում գեներացվի գունավոր հեղափոխության մի ճյուղ:

Երկրորդն այն է, որ թեկնածուներից մեկի նկատմամբ մեծ ուշադրություն է սկսել սևեռվել: Իսկ որպեսզի նա կարողանա ինչ-որ մի գործողության նախապատրաստվել, պետք է, ուրեմն, նրա վրայից շեղել համընդհանուր ուշադրությունը:

Հարց -Իսկ ո՞վ է այդ ինչ-որ մեկը:

Ա. Ամարյան - Եթե ուշադիր նայենք, ապա ընդամենը մեկ հոգի է երևում որպես ընդդիմախոս: Ընդ որում նա այսօրվա գործող նախագահ և նախագահի թեկնածու Սերժ Սարգսյանին ընդդիմախոս է, ոչ թե իր «ես»-ով, այլ իր թիկունքում առկա ուժերով: Չի բացառվում, որ այդ անձնավորությանն այսօր սատարում և ֆինանսավորում է արտասահմանում գտնվող մի ուժ, որն օգտագործում է նաև ՀՀ-ում գործող աղանդներին:

Հարց - Դուք ինչ որ ապացույցներ ունեք:

Ա. Ամարյան - Ապացույցները, եթե, օրինակ, պետական մարմինները ցանկություն ունենան, կարող են շատ շուտ հավաքել: Նման ապացույցներ միայնակ հավաքելը իմ ուժերից վեր է: Սակայն դա, ընդհանուր առմամբ, դժվար գործընթաց չէ, եթե պետական մարմինները, ուժային կառույցները ցանկանան այդ նյութերը հավաքել:

Հարց - Իսկ ի՞նչ տեղեկատվության աղբյուրներ կնշեիք, որոնց հիման վրա նման եզրակացության եք եկել:

Ա. Ամարյան - Տեղեկատվության առաջին աղբյուրը թեկնածուների կյանքի և կենսագրական տվյալների վերլուծությունն է, թեկուզ այն` ինչ-որ կա համացանցի կայք-էջերում` սովորելու և աշխատանքի վայրերը, ովքե՞ր են նրան դասավանդել կամ ղեկավարել, ինչպիսի՞ կարիերա է ունեցել, հասարակական կազմակերպություններում ներգրավվածությունը, մասնագիտական կամ գործնական շփումները:

Այս եղանակով ես ուսումնասիրել եմ բոլոր թեկնածուների կենսագրությունը և հստակ տեսել եմ, որ քաղաքական դաշտում Հայաստանի Հանրապետության նախագահի թեկնածուների մեջ այսօրվա գործող նախագահին` Սերժ Սարգսյանին այլընտրանք չկա:

Հարցազրույցը՝ Սամվել Մարտիրոսյանի