Փաստ ինֆո

Աշխարհի տարբեր լրատվամիջոցներ անդրադարձել են հունվարի 31-ին՝ ուշ երեկոյան ՀՀ նախագահի թեկնածու Պարույր Հայրիկյանի դեմ կատարված մահափորձին: Անդրադառնալով ՀՀ ԱԺ նախագահ Հովիկ Աբրահամյանի խոսքերին, «interfax»-ը նշում է, որ հանրապետության օրենսդիր մարմնի ղեկավարը նշել է, որ «Հայրիկյանի դեմ մահափորձը հարված է մեր պետականությանը: Մենք միանշանակ դատապարտում ենք տեղի ունեցածը և հույս ունենք, որ իրավապահ մարմինները կկարողանան արագ բացահայտել հանցագործությունը»:

Այս նույն լրատվական գործակալությունն անդրադառնում է նաև ՀՀ ԱԺ փոխխոսնակ Էդուարդ Շարմազանովի ասածին, որը նույնպես նշել է, որ ՀՀ նախագահի թեկնածու Պարույր Հայրիկյանի դեմ կատարված մահափորձն ուղղված է իշխանությունների և հանրապետության դեմ: «interfax»-ը նաև տեղեկացնում է, որ ըստ խորհրդարանի փոխխոսնակի, մահափորձը ձեռք էր տալիս նրանց, ում չի գոհացնում կայուն և անվտանգ Հայաստանը:

Իսկ BBC-ն հղում անելով հայկական հեռուստատեսությանը, հայտնում է, որ ՀՀ ԱԺ նախագահ Հովիկ Աբրահամյանը չի բացառել, որ փետրվարի 18-ին նախատեսված նախագահական ընտրությունները թեկնածու Պարույր Հայրիկյանի դեմ կատարված մահափորձի պատճառով կարող են հետաձգվել:

BBC-ն նաև ներկայացրել է, որ համաձայն ՀՀ սահմանադրության, թեկնածուի առջև, ընտրություններին մասնակցելու համար խոչընդոտներ առաջանալու դեպքում, քվեարկության օրը կարող է երկու շաբաթով հետաձգվել:

Իսկ ԻՏԱՐ-ՏԱՍՍ-ը անդրադառնալով այս թեմային նշում է, որ մարդասպանը Հայրիկյանի «վրա կրակել է երկու անգամ, երբ նա դուրս գալիս է եղել մեքենայից»: Մեջբերվում է նաև ՀՀ Աժ խոսնակ Հովիկ Աբրահամյանի խոսքը, ով ասել է, որ « ...ընտրությունները կախված են թեկնածուի վիճակից: Եթե Հայրիկյանը կարողանա շարունակել ընտրական գործընթացը, ապա ընտրությունները տեղի կունենան նշանակված ժամկետին՝ փետրվարի 18-ին, հակառակ դեպքում քվեարկությունը կհետաձգվի»:

Նշենք, որ ամենատարբեր միջազգային լրատվամիջոցներն այս դեպքին անդրադառնալուց բացի խոսել են վիրավորի՝ հիվանդանոցում գտնվելու, վիրահատության և դրանից հետո նրա առողջության և ինքնազգացողության մասին՝ հայտնելով, որ ՀՀ նախագահի թեկնածուի կյանքին վտանգ չի սպառնում: