Փաստ ինֆո

Հ.Յ.Դաշնակցության Հայաստանի Գերագույն մարմինը, «Օրինաց երկիր» և «Բարգավաճ Հայաստան» կուսակցությունները դատապարտում են ՀՀ նախագահի թեկնածու Պարույր Հայրիկյանի դեմ կատարված մահափորձը և նրան շուտափույթ ապաքինում մաղթում:

«Այն ուղղված է մեր պետականության և ինքնիշխանության դեմ, փորձ է սերմանելու վախի և անապահովության մթնոլորտ: Իրավապահ և ազգային անվտանգության մարմինների պարտքն է բացահայտել հանցագործության կատարողներին ու պատվիրատուներին: Պետք է դուրս գալ այն փակ շրջանից, երբ մեր երկրի համար պատասխանատու ժամանակներում նման դեպքեր են արձանագրվում և մնում չբացահայտված:

Պարույր Հայրիկյանը մեծ կենսափորձով և դժվարությունների միջով անցած ազգային-պետական գործիչ է, վստահ ենք՝ նա կհաղթահարի նաև այս փորձությունը»,-մասնավորապես ասված է ՀՅԴ Հայաստանի Գերագույն մարմնի հայտարարության մեջ:

«Սա դավադիր հարված էր պետությանը, Հայաստանի ժողովրդին և իշխանություններին: Կուսակցությունը դատապարտում է տեղի ունեցածը և ակնկալում իրավապահ մարմիններից հանցագործության արագ բացահայտում: ՕԵԿ-ն իր զորակցությունն է հայտնում Պարույր Հայրիկյանին, նրա ընտանիքին և քաղաքական թիմին և մաղթում շուտափույթ ապաքինում», -ասված է ՕԵԿ-ի հայտարարության մեջ:

«Բարգավաճ Հայաստան» կուսակցությունն իր խորը մտահոգությունն արտահայտելով Պարույր Հայրիկյանի հետ տեղի ունեցած դեպքի առթիվ` տարածած հաղորդագրության մեջ մասնավորապես նշում է. «Մարդկայնորեն հայտնում ենք մեր զորակցությունն իրեն, իսկ իրավապահ մարմիններից ակնկալում ենք հնարավորինս արագ և արդյունավետ քննության իրականացում»:

Ոստիկանության հաղորդագրության համաձայն՝ Պ.Հայրիկյանի նկատմամբ սպանության փորձը տեղի է ունեցել հունվարի 31-ին՝ ժամը 23.20-ի սահմաններում, Տպագրիչների փողոցի թիվ 9 շենքի բակում։ Դեպքի վայրում հայտնաբերվել է  7.62 մմ տրամաչափի 1 գնդակ: Նշանակվել են համալիր փորձաքննություններ: