Փաստ ինֆո

Փետրվարի 11-ին ՀՀ վերաքննիչ քրեական դատարանում կշարունակվի Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի` անցյալ տարվա նոյեմբերի 28-ի դատավճռի դեմ բերված բողոքով դատական նիստը:

Թերթը գրում է, որ ըստ գործի նյութերի` Ա. Գասպարյանը խաբեության, գողության և կողոպուտի միջոցով 2 տարվա ընթացքում հափշտակել է թվով 7 տուժողների գույքը: Նա տարբեր ժամանակահատվածներում ծանոթացել է կանանց հետ, նրանցից վերցրել թանկարժեք զարդեր և անհետացել:

Բացի այդ, Ա. Գասպարյանը Ա. Ղարագյոզյանի կյանքի կամ առողջության համար վտանգավոր բռնության գործադրմամբ, սեռական և այլ շահագործման վիճակի մեջ է դրել նրան:

Մասնավորապես` Ա. Գասպարյանը վերջինիս խաբեությամբ տարել է հյուրանոցային համալիրներից մեկում վարձակալած առանձնասենյակ և ստիպել նրան, որ իր կամքին հակառակ սեռական հարաբերություն ունենա անծանոթ մի տղամարդու հետ, իսկ ծառայությունների դիմաց վճարելիք գումարը ինքն է վերցրել:

Երկրորդ անգամ Ա. Գասպարյանը Ա. Ղարագյոզյանին կրկին ներքաշել է սեռական շահագործման մեջ` պահանջելով, որ նա սեռական հարաբերություն ունենա` այս անգամ իր ընկերոջ հետ: Կինը հարկադրված կատարել է նրա պահանջները: Այնուհետև սպառնալիքների ազդեցության տակ` Ա. Ղարագյոզյանը ուղեվարձի դիմաց տաքսու վարորդին վճարել է ՌԴ 5000 ռուբլի:

Տաքսու վարորդը 2011թ. մայիսի 13-ին` ՀՀ ոստիկանության Արմավիրի մարզի քննչական բաժնում հաղորդում է տվել` Ա. Ղարագյոզյանի կողմից կեղծ փողեր իրացնելու վերաբերյալ:

Ըստ ընդհանուր իրավասության առաջին ատյանի դատարանի դատավճռի` Արմեն Գասպարյանը դատապարտվել է 9 տարի 6 ամսվա ազատազրկման:

Վերաքննիչ բողոք ներկայացնող կողմը գտնում է, որ պատիժն իրավաչափ չէ: