Փաստ ինֆո

2011թ. հուլիսի 31-ին ծառայողական պարտականությունները կատարելիս հրազենից վիրավորված, Վայքի գնդում ծառայած Հենրիկ Կարապետյանի գործն արդեն դատարանում է և փետրվարի 5-ին կհրապարակվի գործով դատավճիռը: Թերթը գրում է, որ Հենրիկը վիրավորվել էր իրեն ամրակցված զենքից, իր պնդմամբ` ծառայակցի կողմից, ով նախաքննության ընթացքում ցուցմունք էր տվել նրա դեմ և այժմ գտնվում է ՌԴ-ում:

Ինչպես պատմում է Հենրիկը, դեպքը տեղի է ունեցել հենակետում` իր հերթապահության ժամանակ:

«Հերթապահության վերջում Հենրիկը հոգնել է, զենքը ցած դրել և հենվել դիտակետի պատին ու ննջել: Ապա զգացել է, որ իր հետ դիտակետում կանգնած զինվորն իրեն արթնացնում է: Ուշքի գալուց հետո նկատել է, որ զենքը չկա: Ապա նկատել է, որ այն գտնվում է իր ծառայակցի մոտ, ով դիմելով Հենրիկին` ասել է` հը՞, կրակե՞մ: Տղաների «կռիվ-կռիվն» իսկական ողբերգություն է դարձել: Հենրիկը լսել է կրակոցի ձայնն ու ընկել գետնին»,- գրում է թերթը:

Դատական նիստերի ընթացքում Հենրիկը պնդել է, որ գործով վկաների ցուցմունքների մեջ եղել են բազմաթիվ հակասություններ: Նրանց ցուցմունքները հակասել են նախնական ցուցմունքներին:

Բացի այդ, Հենրիկի հարազատները համոզված են, որ. «Փորձագետների` ընդհուպ սեղմումով կրակոցի ակնհայտ կեղծ եզրակացությունը շփոթության մեջ է գցել քննչական մարմիններին, եթե, իհարկե, դա չի արվել նրանց պատվերով: Հուսով ենք, որ գործը վարող դատավոր Պապոյանը անկախ փորձագետների կեղծ եզրակացությունը հիմք չի ընդունի և կկայացնի արդարացի դատավճիռ»:

«Այս գործով վերջին երկու դատական նիստերը, որտեղ ներկայացվել են փորձագետների փայլուն հիմնավորումները, թե ինչպես է կրակոցը եղել կիպ սեղմումով, ապա զենքը հայտնվել պատին հենած վիճակում, չեն ձայնագրվել` ձայնագրող սարքի անսարք լինելու պատճառով, սակայն պատասխանող կողմն ունի նիստերի բոլոր ձայնագրությունները»,- եզրափակում է հոդվածագիրը: