Փաստ ինֆո

Սեպտեմբերի 23-ին Ս. Խաչատուրյանը փողոցում ձերբակալվում է, որի դեմ, ինչպես հետագայում պարզվում է, ցուցմունք էր տվել ոմն Արթուր՝ ասելով, որ սեպտեմբերի 21-ին նա` Ս. Խաչատուրյանը, իրենից գողացել է ոսկե շղթա ու փախել:

Բացի այդ, գողության ժամանակ, ըստ Արթուրի պատամածի, Ս. Խաչատուրյանը հարվածել է իրեն՝ կոտրելով ատամները:

Ու չնայած, որ դատաբժշկական փորձաքննությունը չի հաստատել Արթուրին ծեծելու վարկածը, ծեծն ապացուցող որևէ հետք չկա, ատամների հետ ամեն ինչ կարգին է, ականատես վկաներ էլ չկան, իսկ տուժողն ինքը խճճվել է իր իսկ կողմից տրված հակասական ցուցմունքների մեջ, այնուամենայնիվ, Ս. Խաչատուրյանին կալանավորում են:

Թերթը գրում է, որ նրա պաշտպանը, ով ոչ վաղ անցյալում եղել է քննիչ, վստահեցրել է, որ հնարավոր չէ, որ 27գրամ քաշով ոսկե շղթան պոկելու դեպքում մարդու պարանոցին հետքեր չմնան:

Ինչպես նշել է Ս. Խաչատուրյանը, դեպքի օրը տանից դուրս է եկել՝ միայն իր զարմուհուն աշխատանքից տուն ուղեկցելու համար, որից հետո այլևս տանից դուրս չի եկել: Սա հաստատել են նաև նրա բարեկամները, ում տանը նա ժամանակավորապես բնակվել է: Եվ, այնուամենայնիվ, այս ամենը չի համոզել քննիչներին, և գործն ուղարկվել է դատարան:

Ս. Խաչատուրյանը նշում է, որ քննության ընթացքում թույլ են տրվել օրենքի մի շարք խախտումներ, իսկ տուժող Արթուրը քրեական գործի նախաքննության ընթացքում մեկնել է ՌԴ, ինչը, ըստ նրա, քրեական դատավարության օրենսգրիքի նորմերի խախտում է: Իսկ ինչ վերաբերում է քրեական օրենսգրքի խախտումներին, ապա նախաքննության ընթացքում չեն կատարվել մի շարք քննչական գործողություններ:

Հունվարի 31-ին կկայանա դատական առաջին նիստը: Պաշտպանը նպատակ ունի միջնորդություն ներկայացնելու` քրեական գործը կարճելու վերաբերյալ՝ հանցակազմի բացակայության հիմքով: Ի դեպ Ս. Խաչատուրյանի խափանման միջոցը փոխելու վերաբերյալ պաշտպանի միջնորդությունը ընդհանուր իրավասության առաջին ատյանի դատարանը մերժել էր, և պաշտպանը դիմել էր ՀՀ վերաքննիչ դատարան:

«Ստացվում է, որ յուրաքանչյուրին կարող են մեղադրել գողություն կատարելու մեջ՝ հիմնվելով ինչ որ մարդկանց մերկապարանոց հայտարարությունների վրա և բանտ նստեցնե՞լ»,- հարցնում է Ս. Խաչատուրյանի պաշտպանը:

«Տեսնենք, թե ինչ զարգացում կստանա գործը: Միգուցե դատարանում ավելի տրամաբանական մոտցու՞մ կցուցաբերվի, քան՝ նախաքննության ընթացքում»,- եզրափակում է հոդվածագիրը: