Փաստ ինֆո

«Ժողովուրդ» օրաթերթի խմբագրությունը նախաձեռնել է բողոքի երթ դեպի Կենտրոն և Նորք Մարաշ վարչական շրջանների դատարան, որը տեղի կունենա հունվարի 30-ին` ժամը 11:30: Երթի նպատակն է պահանջել, որպեսզի դատարանի կողմից հանվի «Ժողովուրդ» օրաթերթի գույքի վրա դրված արգելանքը:

Հիշեցնենք, որ օրաթերթի խմագրությունը հունվարի 24-ին ստացել է Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի որոշումը` օրաթերթին պատկանող գույքի վրա 3 մլն դրամի չափով արգելանք  դնելու մասին: Խմբագրակազմը կարծում է, որ այդպիսով կարող է վտանգվել  թերթի հետագա հրապարակումը:

Թերթի տնօրեն Դավիթ Վանեսյանի խոսքով՝ դեռևս 2012թ. լրատվությունն են  հրապարակել  գյուղնախարարության սննդի անվտանգության պետական տեսչության ուսումնասիրության  արդյունքների մասին, ըստ որի Երևանի թռչնաբուծական ֆաբրիկայի արտադրած հավկիթներն իրենց որակական հատկանիշներով չեն համապատասխանել անհրաժեշտ չափանիշներին, եղել են ժամկետանց: Տնօրենի խոսքով` թռչնաֆաբրիկայի սեփականատեր  Խաչիկ Խաչատրյանը վիրավորվել է և «Ժողովրդին» դատի տվել՝ պահանջելով 3 մլն դրամ:

Ըստ Դ.Վանեսյանի,  սա առաջին դատավարությունը չէ թերթի դեմ,  և տարբեր օլիգարխներ են հուզվել, ինչպես նա է ասում,  ճշմարտությունը կարդալով  «Ժողովուրդ»-ի էջերում: Մեր զրուցակցի փոխանցմամբ, սովորական են ընդունում տեղի ունեցածը: «Պարզապես իր պատիվն ու արժանապատվությունը, իբրև թե վիրավորելու դիմաց 3 մլն դրամ պահանջված գումարը՝ սեփականատիրոջ կողմից, լրատվամիջոցի համար բավական մեծ գումար է, մեր բողոքը դրա դեմ է: Ցանկացած խմբագրության նման գումար պարտադրելով՝ սնանկացնում են, ինչը ճիշտ չենք համարում»,- ասաց «Ժողովուրդ»-ի տնօրենը՝ հավելելով, որ եթե  խնդիրը արտադրանքի հետ է և ոչ թե թերթի, ապա արտադրանքի եզրակացությունը գյուղնախարարությունն է տվել, իսկ թերթը տվյալ դեպքում ընդամենը լրատվություն հաղորդելու իր գործառույթն է կատարել:

«Նույնիսկ տարօրինակ է, թե ինչու է գործարարը վիրավորվել»,- նշեց Վանեսյանը՝ հավելելով, որ հայցադիմումից ևս պարզ չէ, թե հատկապես ինչից է վիրավորվել կամ դժգոհ թռչնաֆաբրիկայի սեփականատերը:

Հեղինակ` Էլեոնորա Առաքելյան