Փաստ ինֆո

ԱՄՆ քաղաքացի Մ. Զիեր Փոլը Երևան-Իջևան ավտոճանապարհին նստելով պատահական մասնավոր մեքենա, չի էլ ենթադրել, որ իրեն բացահայտ կողոպտելու են: Դա տեղի է ունեցել այն բանից հետո, երբ նա 2011թ. հուլիսի 4-ին` ժամը 20:30-ի սահմաններում Երևան-Իջևան ավտոճանապարհի 63-րդ կիլոմետրում, ըստ քրեական գործի նյութերի, նստել է Երևանի բնակիչ Օնիկ Սահակյանի կողմից շահագործվող «Ֆոլքսվագեն Պասատ» մակնիշի, 17 ՕՏ 208 պետհամարանիշի ավտոմեքենան:

Քննությամբ պարզվել է, որ Օնիկ Սահակյանը ՀՀ ՊՆ թիվ N զորամասի զինծառայող Ս. Ջանունցի հետ օգտվելով Մ. Զիեր Փոլի կողմից իր ավտոմեքենան նստելու հանգամանքից, Ս. Ջանունցի հետ նախնական հանցավոր համաձայնության գալով, ներկայացել է որպես ոստիկանության աշխատակից և Մ. Զիերին հարցուփորձ արել չթույլատրվող իրեր կամ առարկաներ պահելու մասին։

Բացասական պատասխան ստանալով՝ Օ. Սահակյանը մեքենան դուրս է բերել բանուկ մասից, կայանել: Այնուհետև վերջինիս և Ս. Ջանունցի պահանջով ամերիկացի ուղևորը դատարկել է իր պայուսակի պարունակությունը, որի ընթացքում Օ. Սահակյանը բացահայտ կերպով հափշտակել է Մ. Զիերի մոտ գտնվող դրամապանակը ու փորձել է պարզել բանկային քարտի գաղտնագիրը։ Միաժամանակ Ս. Ջանունցը հափշտակել է Մ. Զիերի մոտ գտնվող 100 ԱՄՆ դոլար արժողությամբ ծալովի դանակը և հայտնել, որ դանակ պահելու համար Հայաստանում քրեական պատասխանատվություն է նախատեսված:

Մ. Զիերի մոտ նյութական միջոցներ չհայտնաբերելով, Օ. Սահակյանը մեքենան վարել է Սևան քաղաք, որտեղ «Արարատբանկ» ՓԲԸ-ի Սևանի մասնաճյուղի բանկոմատի միջոցով Ս. Ջանունցի հետ կանխիկացրել ու հափշտակել է Մ. Զիերի բանկային հաշվին եղած 140 000 ՀՀ դրամը։ Սա նախաքննական մարմնի վարկածն է՝ հիմնված քննությամբ ձեռք բերված ապացույցների վրա և ինչպես Օնիկ Սահակյանին, այնպես էլ զինծառայող Սերգեյ Ջանունցին մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին կետի հատկանիշով, այսինքն` մի խումբ անձանց կողմից նախնական համաձայնությամբ կատարված կողոպուտի: Գործի քննությունը շարունակվում է դատարանում։