Փաստ ինֆո

Թերթն անդրադարձել է հունվարի 14-ից հացադուլի մեջ գտնվող վանաձորցի, 33-ամյա Շալիկո Մանուչարյանի կալանքի երկարաձգման թեմային` նշելով, որ նրա հարազատները, հարևանները, բարեկամներն ու ընկերները պահանջում են ազատ արձակել արդեն 8 ամիս կալանքի տակ գտնվող, քրեական գործով մեղադրյալ Շ. Մանուչարյանին: Նա մեղադրվում է Արսեն Փիրիխանյանի նկատմամբ մահափորձ կատարելու մեջ:

Թերթը հիշեցնում է, որ Շ. Մանուչարյանին մեղադրանք էր առաջադրվել ՀՀ քրեական օրենսգրքի 112-րդ հոդվածի 2-րդ մասի 9-րդ կետով և 235-րդ հոդվածի 1-ին մասով:

Դեպքի առթիվ հարուցված քրեական գործը 6 ամիս քննելուց հետո նախաքննական մարմինը կասեցրել էր այն` մեղադրյալի գտնվելու վայրն անհայտ լինելու հիմքով: Թվում էր, թե նրան հայտնաբերելուն պես վարույթն անմիջապես վերսկսվելու է, և գործն ուղարկվելու է դատարան, քանի որ բոլոր ապացույցները ձեռք են բերված: Այնինչ մեղադրյալին հայտնաբերելուց և կալանվորելուց հետո նոր է սկսվել քննությունը` շարունակվելով 8 ամիս:

«Փաստորեն ամիսներ շարունակ մարզի դատախազի վերահսկողությամբ քննիչներն անգործության, այն է` քննչական գործողություններ չկատարելու և առաջադրված մեղադրանքը չհիմնավորելու պայմաններում, Շալոն կալանքի տակ է պահվում` գործում ապացույցների բացակայությամբ»,- գրում է թերթը` ավելացնելով, որ օրերս մարզի դատախազն ասել էր, թե «ոչ մի լուրջ փաստ չկա նրա նկատմամբ, եթե մինչև հունվարի 24-ն էլ ինչ-որ բան չլինի, բաց կթողնեն»:

Սակայն մինչ մարզի դատախազ Կ. Շահբազյանը նման հայտարարություն էր անում, նախաքննական մարմինը դատարանին միջնորդել էր երկարացնել Շ. Մանուչարյանի կալանքի ժամկետը, ինչը դատարանը բավարարել էր:

Ըստ «Ժամանակի» աղբյուրների` Շ. Մանուչարյանի մասնակցությունը դեպքին հավանական է հետևյալ հիմնավորմամբ. նա քրեական բնույթի ինչ-որ վեճեր է ունեցել Ռուսաստանի քրեական միջավայրում, ինչը հարթվել էր Դարբինյանների օգնությամբ: Շալոն հայտնի է նաև Լոռու մարզի դատախազի սպանության գործով: Կասկածյալների թվում նա էլ էր բերման ենթարկվել: