Փաստ ինֆո

Հունվարի 28-ին ուժի մեջ մտավ Հանրապետության հրապարակում գտնվող Արտաքին գործերի նախարարության շենքին վերաբերող` «Պետական գույքն օտարելու մասին» ՀՀ կառավարության 2012թ.-ի դեկտեմբերի 27-ի որոշումը:

Ըստ այդմ, կառավարությունը որոշել է Կառավարական N 2 մասնաշենք հասցեում գտնվող՝ 14 241,9 քառ. մետր մակերեսով շենք-շինությունները և դրանց սպասարկման ու օգտագործման համար հատկացված հողամասի պետական բաժնեմասն ուղղակի վաճառքի ձևով «Տանգո» փակ բաժնետիրական ընկերությանը օտարելու համար կնքել առուվաճառքի նախնական պայմանագիր:

Գույքի գնահատված արժեքը 2012 թ.-ի հոկտեմբերի 2-ի դրությամբ սահմանվել է 20 մլրդ 692 մլն 373 հազար դրամ:

Գնորդին է օտարվում նաև գույքի զբաղեցրած, օգտագործման ու սպասարկման համար հատկացված հողամասի 0,3928 հեկտար բաժնային մասը` 235 մլն 680 հազար դրամ կադաստրային արժեքով:

Որոշմամբ սահմանվել է նաև, որ գույքը շարունակվելու է անհատույց օգտագործվել վաճառողի կողմից և գնորդին հանձնման-ընդունման ակտով կհանձնվի առուվաճառքի նախնական պայմանագրի ստորագրման ամսաթվից երեք տարի հետո նույն ամսաթվին` այն զբաղեցնող պետական հիմնարկներից և վարձակալության պայմանագրի ժամկետը լրացած վարձակալներից ազատված վիճակում:

Գույքի առուվաճառքի գնի հնարավոր ավելի բարձր արժեքի բացահայտման նպատակով ՀՀ կառավարությունը որոշել է այս որոշումն ուժի մեջ մտնելուց հետո եռամսյա ժամկետում կազմակերպել գույքի օտարման դասական աճուրդ:

Աճուրդը չկայանալու կամ աճուրդի հաղթողի հետ պայմանագիրը մինչև 2013 թ.-ի ապրիլի 30-ը չկնքվելու դեպքում գույքը և հողամասի բաժնեմասերը՝ այս որոշման մեջ նշված պայմաններով, հիմնական առուվաճառքի պայմանագրի կնքմամբ կվաճառվեն «Տանգո» ՓԲԸ-ին:

Գույքի առուվաճառքի հիմնական պայմանագիրը 2013 թ.-ի մայիսի 15-ի դրությամբ որևէ պատճառով չկնքելու դեպքում` «Տանգո» ՓԲԸ-ն պարտավորվել է անմիջապես օտարել ՀՀ-ին, և ՀՀ-ն պարտավոր է անվանական արժեքով գնել Երևան քաղաքի Վազգեն Սարգսյան 3 հասցեում գտնվող՝ 0,5081 հեկտար հողամասի սեփականատեր, «Տանգո» ՓԲԸ-ի դուստր հանդիսացող «Սալսա Դիվելոփմենթ» ՓԲԸ-ի բոլոր թողարկված և լրիվ վճարված բաժնետոմսերը:

Որոշմամբ սահմանված են նաև գնորդի ու վաճառողի պարտավորությունները:

Գնորդի պարտավորությունների մեջ, մասնավորապես, ներառված է, որ գույքի հանձնում-ընդունումից և անհրաժեշտ ծավալի ներդրումների իրականացմամբ վերակառուցումից հետո գույքն օգտագործել բացառապես հյուրանոցային և նմանատիպ գործունեության նպատակով:

Այդ հասցեում գտնվող՝ 789,4 քառ. մետր մակերեսով տարածքն օգտագործող «Մելլաթ բանկ» ՓԲԸ-ին թույլատրվում է վարձակալության պայմանագրի հիմքով օգտագործումը՝ մինչև 2015 թ.-ի դեկտեմբերի 8-ը:

Վաճառողը պարտավորվում է աջակցել և օժանդակել գնորդին՝ այդ հասցեում գտնվող շենքի բաղադրիչը համարվող և գույքի հետ միասին ճարտարապետական ամբողջություն կազմող այն ենթամասերն ու հատվածները և շենքով զբաղեցված հողամասի համապատասխան բաժնեմասերը գնորդի հաշվին և վերջինիս համար ընդունելի ողջամիտ արժեքով ձեռք բերելու հարցում, որոնք այս որոշման ընդունման ամսաթվի դրությամբ պատկանում են երրորդ անձանց և հայտնի են՝ որպես «Արարատ» ռեստորան, որը զբաղեցնում է 856 քառ. մետր մակերեսով տարածք, «Նոյան տապան» գրախանութ` 418 քառ. մետր մակերեսով, և «Անի» գրատուն` 150,2 քառ. մետր մակերեսով տարածքներ: