Փաստ ինֆո

Սահմանադրական դատարանը հունվարի 25-ին գրավոր ընթացակարգով քննության առավ Ազգային ժողովի մեծամասնական ընտրակարգով 2012թ.-ի դեկտեմբերի 2-ի լրացուցիչ ընտրության արդյունքներով թիվ 1 ընտրատարածքային ընտրական հանձնաժողովի դեկտեմբերի 7-ի որոշումը վիճարկելու վերաբերյալ այդ ընտրատարածքից պատգամավորի նախկին թեկնածու Ստյոպա Սաֆարյանի դիմումի հիման վրա գործը:

Հաշվի առնելով, որ գործում առկա են անհրաժեշտ բոլոր փաստաթղթերը, այդ թվում` պատասխանող կողմ ճանաչված թ.1 ԸԸՀ-ի և հարակից պատասխանողի` ԿԸՀ-ի, սահմանված ժամկետում ներկայացրած` 165 էջից բաղկացած, պարզաբանումները, ՍԴ-ն անցավ խորհրդակցական սենյակ` գործով որոշում կայացնելու համար:

Ինչպես «Pastinfo.am»-ի թղթակցին հայտնեց Ս.Սաֆարյանը, ինքը համոզված է, որ ՍԴ-ին ուղղված իր դիմումի մեջ հանգամանորեն ներկայացրել և հիմնավորել է ընտրությունների կազմակերպման, նախընտրական քարոզչության ժամանակահատվածներում և քվեարկության օրը տեղ գտած «համակարգային ու համատարած բնույթի օրինախախտումները»` դիմումին կցելով նաև 2 խտասկավառակ՝ տեսանյութերով, և 17 էջից բաղկացած հավելվածներ:

Դիմումատուն, սակայն, ակնկալիքներ չունի, որ ՍԴ-ն կբավարարի իր պահանջը և չեղյալ կճանաչի ընտրության արդյունքների վերաբերյալ թիվ 1 ԸԸՀ-ի որոշումը, ըստ որի ԱԺ պատգամավոր է ընտրվել ՀՀԿ-ի կողմից առաջադրված Ռոբերտ Սարգսյանը. «Որովհետև վտանգավոր կլինի առավել ևս այս նախագահական ընտրություններից առաջ ՍԴ-ի կողմից իմ դիմումի բավարարումը»:

«Որպեսզի հետագայում Հայաստանի Հանրապետության պաշտոնական ներկայացուցիչները Մարդու իրավունքների եվրոպական դատարանում չասեն, թե Ստեփան Սաֆարյանն իր իրավունքները չի պաշտպանել մինչև վերջ ՀՀ-ում, այդ թվում` չի դիմել Սահմանադրական դատարան` այս ընտրությունների հետ կապված, ես ուղղակի պարտք եմ համարել դիմել և շատ արագ ավարտին հասցնել այս ամենը, որպեսզի գործն ուղարկենք Ստրասբուրգ»,-պարզաբանեց Ս.Սաֆարյանը:

Հաղթող ճանաչված մրցակցի կողմից թույլ տրված բազմաթիվ խախտումների վերաբերյալ Ս.Սաֆարյանի պնդումներին բացարձակապես համաձայն չէր թ.1 ԸԸՀ-ի նախագահ Գեղամ Հայրապետյանը: Նա պնդեց, որ որևէ դիտորդի կամ վստահված անձի կողմից Ս.Սաֆարյանի մատնանշած խախտումները գրանցամատյաններում արձանագրված չեն: Ինչ վերաբերում է քվեարկության օրն երթուղային տաքսիներով ընտրողներին տեղամասեր զանգվածաբար տեղափոխելու փաստերն ապացուցող տեսանյութերին, ապա, ըստ ԸԸՀ-ի նախագահի, «տեսանյութերից մեկում հարցադրում էր, որտեղ ընտրողներից մեկը պատասխանում է, որ այո’, մեզ մոտից դեպի տեղամաս, որը մի քիչ հեռու է, երթուղային տաքսի է գնացել, և շենքի բոլոր բնակիչներն էլ օգտվել են այդ հնարավորությունից, սակայն նա նշում է նաև, որ իրենց չի ասվել, թե ում պետք է ընտրեն»: