Փաստ ինֆո

Խե՜ղճ Սևանա լիճ… Դեռ բավական չէ, որ մակարդակն իջեցվեց ու չի բարձրացվում այնպես, ինչպես անհրաժեշտ է, դեռ բավական չէ, որ որսագողությամբ հափշտակվել և ոչնչացվել են արդյունագործական ձկնապաշարները, հետո էլ լճի համար չբերվեց հիդրոլոգիական հատուկ նշանակության այն նավը, որը մասնագետները, գիտնականներն անհրաժեշտ էին համարել լճին: Դրա փոխարեն բերվել է ձկնորսական նավ, բնականաբար, ավելի էժան, ինչով էլ իմաստավորվել է սույն գործարքը: Լճի բախտը չբերեց նույնիսկ նավի հարցում, նույնիսկ անհրաժեշտ նավը նրան շա՞տ համարվեց…

«Կամար» ՓԲ ընկերության հիմնադիր ու տնօրեն Հայկ Վարդանյանին առաջադրված մեղադրանքի համաձայն` նա ստանալով «Պետության կարիքների համար հիդրոլոգիական հատուկ նշանակության նավի մատակարարման գնման» պայմանագրով նախատեսված 153,0 մլն դրամ գումարը, նախապես գիտեցել է, որ ՌԴ «Ախտարսկայա Սուդովերֆ» ՓԲԸ-ի առաջարկած 46 մլն 923 հազար 200 դրամին համարժեք 3,2 մլն ՌԴ ռուբլի արժեքով «ԲՊՄ-74 Մ-ԺԴ» տեսակի ձկնորսական նավը չի համապատասխանում նշված պայմանագրի տեխնիկական բնութագրին (ցածր է եղել հայտում ու գնման պայմանագրում նշված «ՌՄ-376» տեսակի կամ դրան համարժեք նավի տեխնիկական չափորոշիչներից): Սակայն, չնայած վերոնշյալին, խաբեությամբ առանձնապես խոշոր չափերի գույք հափշտակելու դիտավորությամբ դիմել է որոշակի գործողությունների: Մասնավորապես` «Պետական գնումների գործակալություն» ՊՈԱԿ-ին ներկայացրած առաջարկվող գնի ինքնարժեքի հաշվարկում որպես «ԲՊՄ-74 Մ-ԺԴ» տեսակի նավի ձեռք բերման գին նշել է 99,0 մլն դրամ:

Այնուհետև նշված նավի ձևափոխման, կահավորման և այն Հայաստան տեղափոխելու վերաբերյալ փաստաթղթերում ակնհայտ կեղծ տվյալներ ներառելով, Հ. Վարդանյանը 2007թ. մարտի 16-ին ՀՀ բնապահպանության նախարարությանը մատակարարել է պայմանագրի տեխնիկական բնութագրին չհամապատասխանող «ԲՊՄ-74 Մ-ԺԴ» տեսակի ձկնորսական նավը և «Կամար» ՓԲԸ-ի գլխավոր հաշվապահ Վարդան Տոռոզյանի օժանդակությամբ հափշտակել պետական բյուջեից հատկացված գումարից 33 559 963 դրամ:

Նույն քր. գործով ամբաստանյալի աթոռին է հայտնվել նաև հիշյալ ընկերության գլխավոր հաշվապահ Վարդան Տոռոզյանը: Քննությամբ պարզվել է, որ նա հանդիսանալով «Կամար» ՓԲԸ-ի հիմնադիր անդամ և գլխավոր հաշվապահ, ինչպես նաև ամերիկյան «Էրչ-Ինվեսթմնթս Ինքորփորեյշն» ընկերության նախագահը, իր խորհուրդներով ու գործողություններով օժանդակել է Հայկ Վարդանյանին` հիշյալ պայմանագրի շրջանակներում խարդախությամբ 33 559 963 դրամի հափշտակություն կատարելուն:

Ըստ մեղադրական եզրակացության, Վ. Տոռոզյանը Հ. Վարդանյանից նախապես իմանալով, որ ՌԴ «Ախտարսկայա Սուդովերֆ» ՓԲԸ-ի հիշյալ նավը չի համապատասխանել նշված պայմանագրի տեխնիկական բնութագրին, «Պետական գնումների գործակալություն» ՊՈԱԿ-ի հայտարարած մրցույթում խոչընդոտները վերացնելու նպատակով, դիմել է որոշակի գործողությունների: Մասնավորապես` մրցույթի կայացման և «Կամար» ընկերության` հաղթող ճանաչվելու համար, ձևականորեն մրցույթի մասնակից է դարձրել մոր` Սվետլանա Ղազարյանի հիմնադրած «Արշալույս» ՍՊԸ-ն, այդ ընկերության անվամբ լրացրել ակնհայտ թերի փաստաթղթեր և դրանք ներկայացրել «Պետական գնումների գործակալություն» ՊՈԱԿ:

Այնուհետև նավի ձևափոխման, կահավորման և այն ՀՀ տեղափոխելու պատրվակով, Վ.Տոռոզյանը «Կամար» ՓԲԸ-ի անունից 2006թ. դեկտեմբերի 30-ին «Էրչ-Ինվեսթմնթս Ինքորփորեյշն» ընկերության հաշվեհամարին փոխանցված ընդհանուրը 100 800 ԱՄՆ դոլար գումարից «Արցախբանկ» ՓԲԸ-ի երևանյան մասնաճյուղից կանխիկ ստացել է 90 000 ԱՄՆ դոլար և այն նույն օրը հանձնել Հայկ Վարդանյանին, որով օժանդակել է վերջինիս` պետական բյուջեից հատկացված գումարից 33 559 963 դրամ գումարը հափշտակելուն:

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (նախագահությամբ` դատավոր Ա.Մկրտչյանի) հիմք ընդունելով մեղադրանքի հիմքում դրված ապացույցները, գտել է, որ Հայկ Վարդանյանի մեղավորությունը ՀՀ քրեական օրենսգրքի 178-րդ հոդվածի 3-րդ մասի 1-ին կետի, իսկ Վարդան Տոռոզյանի մեղավորությունը 38-178-րդ հոդվածի 3-րդ մասի 1-ին կետի հատկանիշներով նախատեսված հանցանք կատարելու մեջ ապացուցված է, որի համար նրանք ենթակա են քրեական պատասխանատվության և պատժի:

Դատարանը 11.05.2011թ. դատավճռով Հայկ Վարդանյանին մեղավոր է ճանաչել ՀՀ քրեական օրենսգրքի 178-րդ հոդվածի 3-րդ մասի 1-ին կետով և նրա նկատմամբ պատիժ նշանակել ազատազրկում 4 տարի 6 ամիս ժամկետով: Նույն քրեական գործի դատաքննության արդյունքում դատարանը հիշյալ ընկերության գլխավոր հաշվապահ Վարդան Տոռոզյանին մեղավոր է ճանաչել ՀՀ քրեական օրենսգրքի 38-178-րդ հոդվածի 3-րդ մասի 1-ին կետով և նրա նկատմամբ պատիժ նշանակել ազատազրկում 4 տարի ժամկետով:

Թվում է, թե սրանով ամեն ինչ պետք է ավարտվեր, սակայն ամբաստանյալները վերաքննիչ բողոքով դիմել էին ՀՀ քրեական և զինվորական վերաքննիչ դատարան` պահանջելով  բեկանել Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի հիշյալ դատավճիռը, կայացնել արդարացման դատավճիռ, կարճել քրեական գործը և դադարեցնել քրեական հետապնդումը` ՀՀ քր.դատ.օր-ի 35 հոդ. 1-ին մասի 2-րդ կետով` ամբաստանյալների արարքում հանցակազմի բացակայության պատճառաբանությամբ:

Սակայն, ՀՀ վերաքննիչ քրեական դատարանը (նախագահող դատավոր` Ա. Դանիելյան, դատավորներ` Մ. Արղամանյան, Մ. Ռեհանյան) 26.07.2011թ. որոշմամբ բողոքը բավարարել է մասնակի. առաջին ատյանի դատարանի դատավճիռը բեկանել է և գործն ուղարկել նույն դատարան` այլ կազմով նոր քննության: Ինչո՞ւ…

ՀՀ վերաքննիչ քրեական դատարանն իր որոշմամբ հիմնավորել է, որ առաջին ատյանի դատարանը սույն գործով դատական քննության արագացված կարգ կիրառելու պայմաններում, ամբաստանյալներ Հայկ Վարդանյանի և Վարդան Տոռոզյանի կողմից դատական նիստում, դեռևս մինչև դատական վիճաբանություններ սկսելը, պաշտպանից հրաժարվելու պարագայում պետք է անցներ ընդհանուր կարգով գործի քննությանը, ինչը չի արել: Նշվածը հանգեցրել է քրեադատավարական օրենքի այնպիսի խախտման, որը բոլոր դեպքերում հիմք է դատական ակտը բեկանելու և գործը նույն դատարան այլ կազմով նոր քննության ուղարկելու համար:

Այժմ հիշյալ քրեական գործը Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում է` այլ կազմով նոր քննության համար: Հետաքրքիր է, թե ինչ է վճռելու դատարանը` սույն գործով դատավոր Լևոն Ավետիսյանի նախագահությամբ: Կանխակալ կարծիք չարտահայտենք, բայց շատ կզարմանանք, եթե դատարանը իր վճռում ժխտի հիդրոլոգիական հատուկ նշանակության նավի փոխարեն ձկնորսական նավ բերելու փաստն ու պետական բյուջեից առանձնապես խոշոր չափերի գումարի հափշտակման մեղադրանքը: Մենք կհետևենք իրադարձությունների զարգացման հետագա ընթացքին:

Հեղինակ` Արթուր Հովհաննիսյան