Փաստ ինֆո

«Տեղի է ունեցել ցավալի հանցավոր արարք: Վերջիվերջո սպանվել է երիտասարդ և համաձայն եմ, որ մեղավորները պետք է կրեն իրենց արժանի պատիժը: Բայց նշված փաստը չի կարող հիմք հանդիսանալ բացարձակ ճշմարիտ փաստերն աղավաղելուն»,- այս մասին թերթի թղթակցին ասել է ամբաստանյալ Սերգեյ Հարությունյանի պաշտպան Հովհաննես Հարությունյանը:

Իսկ Սերգեյ Հարությունյանը կալանավորվել է անցյալ տարվա հոկտեմբերի 18-ին` «Էթնա» ռեստորանային համալիրին հարող տարածքում 27-ամյա Արսեն Շահբազյանի սպանության գործով:

Թերթը հիշեցնում է, որ ոստիկանության Արաբկիրի քննչական բաժնում անցյալ տարվա հոկտեմբերի 19-ին հարուցվել է քրեական գործ` ՀՀ քրեական օրենսգրքի 104-րդ հոդվածի 1-ին մասի հատկանիշներով:

Ամբաստանյալներից 3-ի`Կարեն և Արմեն Հարությունյանների, Անուշավան Հովհաննիսյանի նկատմամբ խափանման միջոց է ընտրվել ստորագրություն չհեռանալու մասին. նրանք նախկինում կալանավորված են եղել: Կասկածյալներից երկուսը` Մեսրոպ Խառատյանն ու Վաղինակ Հարությունյանը, հետախուզման մեջ են:

Թերթը նաև գրում է, որ պաշտպանի ասելով` մեղադրյալ Հ. Հարությունյանը կամավոր է ներկայացել բաժին, տվել ինքնախոստովանական ցուցմունքներ և միայն դրանից հետո է բացահայտվել սպանություն կատարած անձի ինքնությունը:

Միաժամանակ, թղթակցի հետ զրույցում պաշտպանն իր խոսքում նշել է. «Ինչու՞ տուժողի իրավահաջորդը չի նշել նաև այն մասին, որ մյուս տուժողը` Ս. Աբովյանը, դեպքի վայրից իր ավտոմեքենան տեղափոխել է ավտոլվացման և միայն ոստիկանների պահանջից հետո է այն ներկայացրել բաժին: Քանի որ հարկ կլիներ պարզաբանել, թե ինչ եղավ ավտոմեքենայում առկա զենքը, որը մահացու հարված ստանալուց առաջ ցանկացել է վերցնել սպանվածը և կամ` թմրանյութը, որի մի մասն ընկած է եղել դեպքի վայրում»: