Փաստ ինֆո

«ՀՀ նախագահ Սերժ Սարգսյանը դեռ 2 տարի առաջ խոստացել էր հետամուտ լինել մեր երեխաների սպանության գործի բացահայտմանը»,- այսօր լրագրողների հետ հանդիպման ժամանակ նշում են խաղաղ պայմաններում զոհված զինծառայողների ծնողները՝ հավելելով, որ մինչ այսօր ոչ մի դրական փոփոխություն իրենք չեն տեսնում:

«Շարունակական լռությունը և առանց հիմքերի գովաբանությունը՝ բանակի համար կործանարար է»,- ասաց «Բանակն իրականում» նախաձեռնության անդամ Լալա Ասլիկյանը:

Խաղաղ պայմաններում զոհված զինծառայողների ծնողները արդարություն են պահանջում, ասելով, որ «ուզում են իմանալ, թե իրականում ինչն է իրենց զավակների մահվան պատճառը»: Վերջիններս նշում են նաև, որ պետությունը չի կատարել հարուցված գործերի պատշաճ քննություն և չեն պատժվել մեղավորները, ինչը պատճառ է դարձել հայոց բանակում անպատժելիության մթնոլորտին:

2010թ. զոհված զինծառայող Վալերի Մուրադյանի մայրը՝ Նանա Մուրադյանը նշեց, որ իր տղայի գործով շարունակ քննիչներ են փոխվում, «ոչ մի բան չեն անում գործը բացահայտելու համար հակառակը ամեն բան անում են գործը անդունդ տանելու համար»:

Իսկ 2007թ. զոհված Տիգրան Օհանջանյանի հայրը՝ Սուրեն Օհանջանյանն էլ նշում է, որ նախաքննական մարմնի վարկածով իր որդին մահացել է դժբախտ պատահարի հետևանքով, սակայն հավելում, որ չեն հավատում այդ վարկածին:

«Դատաբժշկական փորձաքննության ժամանակ արված լուսանկարներում ակնհայտ երևում է տղայիս մարմնի վրայի վնասվածքները, սակայն բժիշկը դրանք չի արձանագրել, բացի այդ՝ գործերի մեջ գրված է եղել, որ շորերը պատառոտված են, բայց փորձաքննության են ուղարկվել նորմալ վիճակում գտնվող շորեր»,- նշում է Տիգրանի հայրը՝ հավելելով, որ իր տղայի գործը մի ամբողջ հակասությունների շղթա է:

Իսկ զոհված Արայիկ Ավետիսյանի մայրը՝ Անահիտ Մկրտչյանն էլ պնդում է, որ իր տղային սպանել են 100 դոլարի համար: «Տղաս արձակուրդից վերադարձել է զորամաս, իսկ նրան կանչել է գումարտակի հրամանատարը և ասել, որ տուն էիր գնացել ինչի՞ ամբողջ գումարը չբերեցիր»,- պատմում է մայրն ու հավելում, որ ինքը կարողացել է տղային տալ ընդամենը 15 000 դրամ, քանի որ տանը փող չի եղել»:

Արայիկ Ավետիսյանի գործը 2009թ. կասեցվել է սպանությունը կատարողի անհայտ լինելու պատճառաբանությամբ: Սակայն մայրը պնդում է, որ նա գիտի, թե դա ում ձեռքի գործն է «իմ տղային սպանել է գումարտակի հրամանատար Մհեր Ստեփանյանը»,- ասում է Անահիտ Մկրտչյանը:

Իրինա Ղազարյանն էլ՝ Արթուր Ղազարյանի մայրը, նշեց, որ ինքը ևս գիտե, թե որն է որդու սպանության պատճառը։ Նշելով, որ սպանության օրվանից 3 օր առաջ հեռախոսով խոսել էր տղայի հետ, որի ժամանակ էլ տղան ասել էր, որ «Մարտին Ջհանգիրյանը թուրքերի հետ թմրամիջոցների առքուվաճառքով է զբաղվում», իսկ մայրը նրան նախատել է նման բաներ ասելու համար։ Տղայի հետ զրույցից 3 օր անց իրենց կանչում են հոսպիտալ ասելով, որ իրենց տղան գլխի վրա ուռուցք ունի, «բայց մենք այլ բան տեսանք տղայիս բերանը սոսնձված էր, իսկ այդպես անում են, երբ արդեն մահացած է լինում», պատմում է Արթուր Ղազարյանի մայրը։

Այնուամենայնիվ զոհված զինծառայողների մայրերը պնդում են, որ պայքարելու են մինչև վերջ: