Փաստ ինֆո

«Մոտ մեկ ժամ սպասել ենք միայն ռենտգենի պատասխանին, քանի որ բժիշկ չկար: Մինչև ամսի 2-ը լաբորատորիան էլ չէր աշխատում, երեխայից հենց առաջին օրը վերցրած մեզի անալիզը 2 օր մնացել է պալատում»,- թերթի թղթակցի հետ զրույցում պատմել է 2-ամյա Լիա Միսակյանի հայրը` Գ. Միսակյանը:

Դեկտեմբերի 31-ին` ժամը 19:00-ի սահմաններում, Լիայի առողջական վիճակը կտրուկ վատանում է և նրան տեղափոխում են «Արաբկիր» բժշկական կենտրոն: Ըստ երեխայի ծնողների` իրենց փոքրիկի մահվան պատճառը այդ բժշկական հաստատության բժիշկների անտարբերությունն է:

Համաձայն երեխայի ծնողների պատմածի` հունվարի 2-ին Լիայի վիճակը նորից կտրուկ վատանում է. «Ամսի 2-ին մտա սենյակ, տեսա` երեխաս հազիվ է շնչում, խռպոցով: Անգամ ես, որ մասնագետ չեմ, հասկանում էի, որ դա սխալ շնչառություն է:

Բժշկուհին իմ հարցերին պատասխանեց, որ երեխայի կոկորդին ձեռք տալ չի կարելի, իսկ թոքերը լսել են, ամեն ինչ նորմալ է»,- պատմում է Գ. Միսակյանը:

Հետագայում հրավիրված մասնագետը մաքրել է երեխայի կոկորդը, բայց, ինչպես ծնողներն են ասում, արդեն շատ ուշ է եղել, և երեխան մահացել է հոր ձեռքերում:

Փոքրիկի հայրը համոզված է, որ եթե առաջին իսկ օրվանից երեխան լիներ բժիշկների հսկողության տակ, և ժամանակին քայլեր ձեռնարկվեին, ապա այսօր երեխան ողջ կլիներ:

Թերթը գրում է, որ թղթակիցն այցելել է «Արաբկիր» բժշկական կենտրոն, որտեղ նրան հայտնել են, որ հիվանդանոցը սկսել է ներքին քննություն:

Դեպքի առթիվ ոստիկանության Արաբկիրի բաժնում նյութեր են նախապատրաստվում: Հունվարի 3-ին նշանակվել է դատաբժշկական փորձաքննություն: