Փաստ ինֆո

Կիրակի օրն Ալժիրի արևելքում, գազի հանքավայրի շրջանում, որտեղ արդեն երկու օր է ինչ տեղի են ունենում պատանդների գերեվարության դրամատիկական դեպքերը, հայտնաբերվել է 25 դիակ:

Թեև դեռ ճշտված չէ, թե մահացածներից քանիսն են պատանդ և քանիսը իսլամիստ գրոհային, բայց և այնպես, տեղական իշխանությունները վստահ են, որ բոլոր զոհվածները հանքավայրի բանվորներ են: Եթե այս տեղեկատվությունը հաստատվեց, ապա նշանակում է, որ իսլամիստների կողմից սպանված զոհերի ընդհանուր թիվը կազմում է 48 մարդ, որոնց մեծ մասը օտարերկրյա քաղաքացիներ:

Նախօրեին Ալժիրի ԶԼՄ-ները հայտնել էին 23 պատանդների մահվան և մի քանի տասնյակ մարդու ճակատագրի անհայտ լինելու մասին:

Շաբաթ օրը իրականացված հատուկ գործողության ժամանակ սպանվել են 32 զինյալներ, իսկ կիրակի օրը հաջողվել է ևս 5-ին գերի վերցնել:

Ալժիրի իշխանությունները հայտարարել են, որ երկու կողմերի զոհերի մասին առավել ճշգրիտ տեղեկությունները կհրապարակվեն ավելի ուշ:

Պատանդների ազատագրման հատուկ գործողությունները սկսվել են շաբաթ օրը: Հայտնվում է, որ զինվորների գրոհն սկսելու հետ գրեթե միաժամանակ, իսլամիստները սկսել են մահապատժի ենթարկել պատանդներին: Հստակ հայտնի է, որ մահապատժի էին ենթարկվել 7 մարդ: Իսկ թե ինչ հանգամանքներում են զոհվել մյուսները, դեռ հայտնի չէ:

Մեծ Բրիտանիայի վարչապետ Դեվիդ Կեմերոնը և ԱՄՆ նախագահ Բարաք Օբաման հայտարարել են, որ պատանդների գերեվարումն ու մահը ահաբեկիչների ձեռքի գործն է: Իսկ Ֆրանսիայի ՊՆ նախարար Ժան-Իվ Լե Դրանը կիրակի օրը հայտարարել է, որ հարյուրավոր պատանդների գերեվարելը նշանակում է «հայտարարել պատերազմ»:

Որոշ տվյալներով իսլամիստները պահանջել են, որ ֆրանսիական իշխանությունները անմիջապես դադարեցնեն զինվորական գործողությունները Մալիում:

«Ինձ առավել շատ բարկացնում է այն, որ այս ամենը մենք անվանում ենք «պատանդների գերեվարում», թեև, եթե գերության մեջ են հայտնվում այսքան շատ թվով մարդիկ, դա, արդեն, պատերազմի ակտ է», - ասել է Լե Դրանը ֆրանսիական հեռուստատեսությանը տված հարցազրույցում:

Իսկ Մեծ Բրիտանիայի վարչապետը նշել է, որ զինյալների հարձակումն Ալժիրում, գազի հանքի համալիրի վրա, ևս մեկ անգամ հիշեցրեց ահաբեկչության սպառնալիքի մասին: Նրա խոսքերով, իր երկիրն ամեն ինչ պետք է անի, որպեսզի այդ երևույթի դեմ պայքարը օրակարգային լինի համաշխարհային հանրության համար: Վարչապետը հաստատել է, որ զոհվածներից 3 բրիտանահպատակներ են եղել: Այս դեպքերի ընթացքում իրենց մեկական քաղաքացիների զոհվելու մասին են հայտարարել նաև Կոլումբիան և Ռումինիան:

Գազի մշակման գործարանը գտնվում է անապատում` Ալժիրի մայրաքաղաքից մոտ 1500 կմ հարավ-արևելք, Լիբիայի սահմանից 60 կմ հեռավորության վրա:

Անցյալ չորեքշաբթի զինյալ իսլամիստները գրավեցին գործարանն ու աշխատակիցների բնակելի համալիրը: Նրանք հարձակվեցին նաև արտասահմանցիներին տեղափոխող ավտոբուսի վրա` սպանելով մի բրիտանացու և ալժիրցու:

Ըստ որոշ տեղեկությունների՝ առևանգիչները պահանջում են, որպեսզի ֆրանսիացիները վերջ տան Մալլի իսլամիստների նկատմամբ ռազմական գործողություններին:

BBC-ն նշում է, որ ավելի վաղ Ալժիրը թույլատրել էր, որպեսզի ֆրանսիական ռազմական օդանավերն օգտագործեն իր օդային տարածքը` Մալլի իսլամիստների դիրքերը ռմբակոծելու համար: