Փաստ ինֆո

Էապես աճել է  վարչական մարմինների ակտերի բողոքարկման դեպքերի թիվը, ինչն անվերապահորեն վկայում է քաղաքացիների կողմից վարչական դատարանի հանդեպ ձևավորված վստահության մասին: Այս մասին Վարչական դատարանի 5-ամյա տարեդարձին նվիրված գիտաժողովում այսօր հայտարարեց ՀՀ վարչական դատարանի նախագահ Կարեն Մաթևոսյանը:
Եթե 2009թ. Վարչական դատարան  մուտք է  եղել  7915  վարչական գործ  և 48 521 վճարման կարգադրություն արձակելու վերաբերյալ հայցադիմում, ապա  2012թ. հայցադիմումները  կազմել են շուրջ 20  հազար, իսկ  վճարման կարգադրություն արձակելու վերաբերյալ հայցադիմումները՝  123 հազար:

Դատարանի նախագահն ընդգծեց, որ վարչական արդարադատությունը մարդու իրավունքների և ազատությունների պաշտպանության գերխնդրի համատեքստում մեծ ձեռքբերում լինելու հետ մեկտեղ դեռևս երկար ճանապարհ ունի անցնելու:

Այսպես, Վարչական դատարանի լիազորությունները սահմանափակվում են պետական և տեղական ինքնակառավարման մարմինների վարչական  ակտերի գործողությոսւնների ու անգործության իրավաչափության ստուգմամբ: Մինչդեռ արևմտյան լավագույն  փորձը վկայում է, որ վարչական արդարադատության խնդիրն  է ապահովել մարդու իրավունքների և ազատությունների պաշտպանությունը ոչ միայն պետական ու տեղական ինքնակառավարման մարմինների, այլ հանրային իշխանական լիազորություններով օժտված և հանրային գործառույթներ իրականացնող  մարմինների հետ փոխհարաբերություններում:

Դատարանի նախագահը գոհունակություն հայտնեց, որ այս ուղղությամբ քայլեր արվում են: Մասնավորապես, դատաիրավական ոլորտում բարեփոխումների քառամյա ծրագրի շրջանակում   դիտարկվել է «վարչական մարմին» հասկացության  մեջ այն սուբյելկտների ներառումը, որոնց պետության կողմից պատվիրակվել են հանրային իշխանության գործառույթներ:
 ՀՀ վարչական դատարանի առաջին նախագահ Տիգրան Մուկուչյանի գնահատմամբ, վարչական արդարադատության ստեղծումը Հայաստանի իրավական մտքի հեղափոխական թռիչք էր, քանզի արմատապես փոխվեցին  սովետական իրավակարգին հարիր պատկերացումները:

ՀՀ Սահմանադրական դատարանի նախագահ Գագիկ Հարությունյանի կարծիքով,  ինստիտուցիոնալ առումով Վարչական դատարանը կայացել է, սակայն  վարչական արդարադատությունը դեռևս  կայացման ընթացքում  է, և չափազանց շատ անելիքներ կան:

«Չի կարող վարչական իրավախախտումների վերաբերյալ օրենսգրքի չգործողության պարագայում վարչական արդարադատությունը լիարժեք իրականացվել, համակարգային լուծումներ են պահանջվում»,- ասաց Գ.Հարությունյանը՝ հույս հայտնելով, որ դատաիրավական բարեփոխումների ծրագրի իրականանալու դեպքում վարչական դատարանի ինստիտուցիոնալ կայացվածությունից  զատ  հնարավոր կլինի խոսել նաև դատարանի ֆունկցիոնալ կայացվածության մասին: