Փաստ ինֆո

ՀՀ նախագահի թեկնածու Վարդան Սեդրակյանը չի շտապում հրապարակել թե քանի նախընտրական շտաբ է ունենալու և որ մարզերում։ «Արմատ» ակումբում այսօր տեղի ունեցած մամուլի ասուլիսի ժամանակ նա հայտարարեց, որ շտաբների քանակը հրավիրված մամուլի ասուլիսում պարզ կլինի փետրվարի 1-ից հետո, երբ կսկսի քարոզարշավի ակտիվ փուլը: Մինչ այդ նա համեմատաբար պասիվ կերպով է զբաղվելու քարոզչությամբ` նախագահի մյուս թեկնածուներին հնարավորություն տալով ինչ-որ կերպ բարելավել իրենց ցուցանիշները, քանի որ ինչպես էլեկտրոնային լրատվամիջոցների առցանց հարցումներն են վկայում, ինքը բոլորից առաջ է:

- Մինչև փետրվարի 1-ն իմ կողմից չեն տարածվելու բուկլետներ, ծրագրեր, չեն լինելու գովազդային հոլովակներ, և ես կբավարարվեմ միայն հեռուստաընկերություններին տված հարցազրույցներով, եթե այդպիսի առաջարկություններ կամ հրավերներ լինեն, մի քանի օր մամուլի ասուլիսներով հանդես կգամ,- ասաց Վ. Սեդրակյանը:

Վերջինիս հավաստմամբ, իր կենտրոնական շտաբն ունենալու է նաև իրավական հանձնախումբ: Վ. Սեդրակյանը տեղեկացրեց նաև, որ նախագահ ընտրվելու դեպքում, նախարարներին և նույնիսկ արտաքին գործերի նախարարին նշանակելու է ոչ թե ինքը, այլ այս անարդար Ազգային ժողովի լուծարումից հետո արդար ընտրություններով ընտրված, ժողովրդի կամքն իսկապես արտահայտող Ազգային ժողովի ձևավորած նոր կառավարությունը: Ամբողջ Ազգային ժողովը հստակ հակակշիռ է լինելու նախագահի ինստիտուտին, ինչը բացառելու է օլիգարխիան, մենաշնորհները, հովանավորչությունը: Ըստ նրա, քաղաքացիներն իրեն ընտրելու են նաև այն պատճառով, որ ինքը չի գալիս կուսակցական թիմով, և չունի որոշակի մարդկանց խումբ, ստվերային կաբինետ, որոնք ստանալու են պատգամավորական մանդատներ կամ նախարարական պորտֆելներ:

Լուսանկարն՝ ըստ Ֆոտոլուրի