Փաստ ինֆո

ՀՀ նախագահի 8 թեկնածուներից առայժմ միայն Սերժ Սարգսյանն է Կենտրոնական ընտրական հանձնաժողով ներկայացրել իր նախընտրական ծրագիրը։ Կից կարող եք ծանոթանալ Ս.Սարգսյանի նախընտրական ծրագրի՝ բանակի և անվտանգությանը վերաբերող բաժնին։

ՀՀ գործող նախագահ և առաջիկա նախագահական ընտրություններում իշխող Հանրապետական կուսակցության կողմից առաջադրված ՀՀ նախագահի թեկնածու Սերժ Սարգսյանն իր նախընտրական ծրագրում ընտրողներին խոստանում է բանակի հետագա կատարելագործման և ամրապնդման համար առաջիկա 5 տարվա ընթացքում հասնել նրան, որ ՀՀ Զինված ուժերը ունակ լինեն իրենց շարժունակությամբ ու մարտունակությամբ անվտանգություն սփռել տարածաշրջանում և անդին՝ հյուծող և պասիվ պաշտպանությամբ զբաղվելու փոխարեն: ՀՀ նախագահի ու ՀՀ Զինված ուժերի գերագույն գլխավոր հրամանատարի գնահատմամբ, դրա հիմքն արդեն իսկ դրված է աշխարհի տարբեր ծագերում Հայաստանի խաղաղապահների կողմից մարտական խնդիրների գերազանց կատարմամբ:

«Դեպի ապահով Հայաստան» կարգախոսը կրող նախընտրական ծրագրում Ս.Սարգսյանը հավաստիացնում է, որ շարունակվելու է ՀՀ ԶՈՒ համալրումը ժամանակակից սպառազինությամբ և ռազմական տեխնիկայով, այդ թվում՝ հայրենական արտադրության: Ընդ որում, առաջնահերթությունը տրվելու է բազմաֆունկցիոնալ համալիրներին, որոնք կլինեն հետախուզության, դիտարկման, հայտնաբերման, թիրախորոշման և խոցման միասնական համակարգեր: Այս ամենում իր կարևոր դերն է ունենալու ժամանակակից և կենսունակ հայրենական ռազմաարդյունաբերական համալիրը, որի մշտական արդիականացումը լինելու է պետության ուշադրության կենտրոնում:

Անկարգությունն ու ծառայակիցների ահաբեկումը տեղ չեն ունենալու ՀՀ Զինված ուժերում, որի անձնակազմը լինելու է առավել կրթված և արհեստավարժ: Բանակում կարգապահությունը հիմնված է լինելու զինծառայողների միջև փոխադարձ հարգանքի և Հայրենիքի պաշտպանության գործում ներդրում կատարելու գիտակցումով հրամանների անվերապահ կատարման վրա: Այս ամենում իրենց անձնական օրինակով օրինակելիության կատարյալ տիպար են լինելու հրամանատարները:

ՀՀ նախագահի թեկնածուն առաջիկա 5 տարիների ընթացքում նախանշում է Զինված ուժերից կոռուպցիայի վանումը: Բանակի անձնակազմը վերջնականապես կձերբազատվի առօրյա սոցիալական խնդիրներից՝ հիմնական ուժերը կենտրոնացնելով մարտունակության և սեփական գիտելիքների շարունակական զարգացման վրա:

Առաջիկա տարիների նպատակների թվում է նաև բանակ-հասարակություն կապերի ամրապնդման գործընթացի շարունակումը՝ դրա արդյունքում ավելի կբարձրանա ԶՈՒ թափանցիկության և քաղաքացիական վերահսկողության մակարդակը:

Ռազմակրթական բարեփոխումներում առաջադեմ լավագույն չափորոշիչների ներմուծմամբ ստեղծվելու է Հայաստանի կարիքներին համապատասխանող ուրույն ռազմակրթական համակարգ, որն ունակ է լինելու փակ շրջափուլով ապահովելու բոլոր կատեգորիաների՝ սպայական, սերժանտական կադրերի պատրաստման մեր կարիքները:

Արժևորելով անդամակցությունը Հավաքական անվտանգության պայմանագրի կազմակերպությանը՝ նրա կանոնադրությամբ Հայաստանի ստանձնած պարտվորությունների ու նպատակների իրականացումը շարունակելու է մնալ առաջնային: «Հայաստանը հետևողականորեն իր ներդրումն է բերելու ՀԱՊԿ հետագա ամրապնդման գործում»,- նշվում է Սերժ Սարգսյանի նախընտրական ծրագրում:

Միաժամանակ շարունակելու են խորանալ գործընկերային հարաբերությունները Հյուսիսատլանտյան դաշինքի հետ՝ հետապնդելով ՀՀ ԶՈՒ մարտունակության բարձրացման, ԶՈՒ-հասարակություն համագործակցության խորացման, պաշտպանական համակարգի շարունակական բարեփոխման նպատակներ:

Սերժ Սարգսյանն ընդգծում է. «Ոչ մի ժողովուրդ և ոչ մի ազգ հայ ժողովրդին չի ընկալում որպես թշնամի: Նույն կերպ հայ ժողովուրդը պահանջել ու պահանջելու է, որ հարևան երկու երկրների իշխանությունները դադարեցնեն հայ ժողովրդի գոյությունը, ինքնիշխանությունը, կայուն ու անվտանգ զարգացման իրավունքը մերժող ու սեփական հասարակությունը դեպի բռնություն և այլատյացություն մղող քաղաքականությունը»: Թեպետ չի նշվում, թե որոնք են այդ երկու հարևանները, սակայն ակնհայտ է, որ խոսքը Թուրքիայի ու Ադրբեջանի մասին է:

Առաջիկայում «Փաստինֆո» գործակալությունը կներկայացնի ՀՀ նախագահի բոլոր թեկնածուների նախընտրական ծրագրերը՝ բանակի, անվտանգության և դատաիրավական ոլորտների վերաբերյալ: