Փաստ ինֆո

Շատ երկրներ են մեղադրում ԱՄՆ-ին մարդու իրավունքները խախտելու մեջ, այդ իսկ պատճառով հեռանկարում նրանք կարող են միանալ ՌԴ-ում կազմվող «Գուանտանամոյի ցուցակին» կամ ստեղծել դրա նմանակները: Այդպիսի կարծիք են հայտնել ռուս քաղաքագետները, որոնք մեկնաբանել են ամերիկյան «Մագնիտսկու ակտին» ի պատասխան ձևավորելիք 60 ամերիկյան քաղաքացիների ցուցակը: Ըստ ցուցակի հեղինակների՝ այդ ամերիկացիները խախտել են մարդու իրավունքները և նրանց մուտքը ՌԴ-ի տարածք կարգելվի:

«Դա ուղղակի և համարժեք պատասխան է «Մագնիտսկու ակտին», նշում է ռազմավարական հաղորդակցությունների կենտրոնի փոխնախագահ Դմիտրի Աբզալովը:

Նրա կարծիքով աշխարհում բավարար են Եվրոպայում գործող ԿՀՎ-ի բանտերի, Գուանտանամոյի բանտի աշխատանքների նկատմամբ հարցեր ունեցող երկրները: «Այս ուղղությամբ կարելի է հավաքել մի մեծ կոալիցիա»,- հայտարարել է փորձագետը՝ կարծիք հայտնելով, որ հեռանկարում Ռուսաստանի նախաձեռնությանը «կարող են միանալ նաև այլ խաղացողներ»:

Ինչ վերաբերում է ցուցակի անհատական կազմին, ապա, ըստ Աբզալովի, դրանում կընդգրկվեն «պետական ծառայողները, զինվորականները, ովքեր առնչվում են մարդու իրավունքների խախտմանը»: Նրանցից որոշ մասի վերաբերյալ նույնիսկ կան նաև ամերիկյան դատարանների որոշումներ: Փորձագետը նաև նշել է, որ այդ ցուցակը մինչև գարուն սկզբունքային փոփոխության չի ենթարկվի, եթե «թշնամական գործողություններ» չլինեն ամերիկյան կողմից:

«Անհրաժեշտ է, որ Ռուսաստանը առավել լուրջ վերաբերի աշխարհում մարդու իրավունքների խախտմանը»,- իր հերթին ասել է Արտաքին հետազոտությունների և նախաձեռնությունների ինստիտուտի գլխավոր տնօրեն Վերոնիկա Կրաշենիննիկովան: Ընդ որում, նա նշել է, որ «առավել չարամիտ խախտողը հանդիսանում է ԱՄՆ-ը»:

Ըստ նրա Ռուսաստանի կողմից ցուցակ ստեղծելը «դրական քայլ» է: Նա հաստատել է, որ ցուցակում կընդգրկվեն «ԱՄՆ-ի այն քաղաքացիները, ովքեր մասնակից են Գուանտանամոյի բանտարկյալների խոշտանգումներին, Աբու-Գրեյբ բանտի իրադարձություններին, ԿՀՎ-ի գաղտնի բանտերին, մարդկանց այնպիսի երկրներ տանելուն, որտեղ խոշտանգումները չեն արգելվում: