Փաստ ինֆո

Թերթը գրում է, որ երեկ ՀՀ պաշտպանության նախարար Սեյրան Օհանյանը ասուլիս էր հրավիրել, որի շրջանակներում շուրջ երկու ժամ պատասխանել է լրագրողների հարցերին:

ՉԻ-ի թղթակցի հարցը վերաբերել է Դոմբասից ՀՀ զինված ուժերի համար քարածուխ բերելուն և այդ ճանապարհին գումարներ յուրացնելու փաստով հարուցված քրեական գործին:

Թղթակիցը մասնավորապես հարցրել է, թե ինչ փուլում է գտնվում քրեական գործը, և ճիշտ է, որ քարածուխ բերելու տենդերը շահել էր Արշալույս Փայտյանի զարմիկներից մեկին պատկանող կազմակերպությունը, որն էլ հետո անբարեխիղճ էր գտնվել: Կան արդյոք ձերբակալվածներ այս գործի շրջանակներում և արդյոք Արշալույս Փայտյանի տեղափոխումները կապված են այս գործի հետ:

Հնչեցված հարցերին ի պատասխան` պաշտպանության նախարար Ս. Օհանյանն ասել է. «Այդպիսի տեղեկություններ չունեմ, որ այդ գործը կապված է Փայտյանի հետ: Քրեական գործ է հարուցված, և այդ գործի շրջանակներում մեր իրավապահ մարմինները համապատասխան աշխատանքներ տանում են: Շատ դեպքերում պաշտպանության նախարարությանն այնպիսի հարցեր են տրվում, որոնք վերաբերում են իրավապահ մարմիններին: Մենք միասին հայտնաբերել ենք համապատասխան նյութեր, որը որ մեզանից պահանջվում է: Այդ նյութերը տրվել են և՛ քննչական ծառայությանը, և՛ դատախազությանը»:

Իսկ այն հարցին, թե արդյոք ՊՆ համակարգից ձերբակալվածներ կան, Ս. Օհանյանը պատասխանել է. «Մեր համակարգից այդտեղ մեղավորներ չկան, որովհետև մենք պայմանագիր կնքել ենք կապալառուի հետ և դրա շրջանակներում կապալառու կազմակերպությունը չի կատարել իր առջև դրված խնդիրը»: