Փաստ ինֆո

«Մոսկվա» կինոթատրոնի դրամարկղից գողություն կատարելու համար մեղադրվող 30-ամյա Ստեփան Հովակիմյանը հիմա էլ մեղադրվում է` իշխանության ներկայացուցչին դիմադրություն ցույց տալու համար: Հունվարի 15-ի Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում տեղի է ունեցել այս գործով առաջին դատական նիստը:

Այս մասին գրում է թերթը և հավելում, որ ըստ մեղադրանքի` նախորդ տարվա հուլիսի 26-ին` նույն դատարանում, գողության գործով ընթացող դատաքննության ժամանակ Ս. Հովակիմյանն իր մոտ եղած ածելիով վնասել էր ձախ ձեռքի նախաբազուկը, իսկ հետո սեղանին դրված բարձրախոսը փորձել էր նետել մեղադրող դատախազ Ս. Հարությունյանի ուղղությամբ, ինչը կանխվել էր:

Սակայն ստեղծված իրարանցման մեջ Հովակիմյանին հաջողվել էր հայտնվել դատախազ Ս. Հարությունյանի կողքին և ոտքով հարվածել նրա կողքին, ինչի համար նրան մեղադրանք է առաջադրվել` իշխանության ներկայացուցչին դիմադրություն ցույց տալու համար:

Երեկվա դատական նիստն սկսվել է առանց տուժող կողմի: Հարցաքննվել են ականատեսները` դատական կարգադրիչները և «Առավոտ»-ի լրագրող Ռ. Մինասյանը:

Ս. Հովակիմյանի հայրը` Բ. Հովակիմյանը, նշել է, որ խառնաշփոթի ժամանակ լրագրողը չի նկատել, որ դատախազն էլ Ստեփանին է հարվածել: Այդ մասին Բ. Հովակիմյանն ասել է լրագրող Ռ. Մինասյանին: Ինչպես գրում է թերթը, լրագրողը տեղեկությունը ճշտել է նաև դատախազ Ս. Հարությունյանից, ով հաստատել է ասվածը: