Փաստ ինֆո

Ռուսական լրատվամիջոցները հաղորդում են, որ «ռուսական մաֆիայի արքային» գնդակահարել են հատուկ ծառայությունների զինանոցում առկա անձայն ինքնաձիգից:

«Օրենքով գող» Դեդ Հասանի՝ նախօրեին մեծ աղմուկ բարձրացրած սպանության հետաքննության վարկածներից մեկով, նրա վրա կրակել են Մսկվայի Պովարսկու փողոցի թիվ 35 տան «սև աստիճանի» վրայից: Մարդասպանը զենքը տեղում չի թողել, որպեսզի հնարավոր չլինի իր կողմից դրա վրա թողած կենսաբանական հետքերը համեմատել նախորդ մահափորձի տեղում թողած հետքերի հետ:

Քննիչները վստահ են, որ մարդասպանը միայնակ չի գործել: Նա ունի դիտորդներ, թիկնապահներ և վարորդ, որոնք նրան տեղեկատվություն են փոխանցում և պաշտպանում թիկունքը: Նրա խնդիրն է եղել արձակել դիպուկ կրակոց և դա նրա մոտ ստացվել է:

Հանցանքի վայրի տարածքում շատ լորենիներ են աճում և դրանց ճյուղերը կրակած գնդակների ուղղությունը կարող էին շեղել, նշել են քննիչները: Իսկ մարդասպանն իր գործն անելուց հետո վերցրել է զենքը, հավաքել դատարկ պարկուճները, մաքրել դրանք փալասով և իր հետ բերած ծալովի աթոռակի հետ միասին նետել «սև աստիճանի» վրա՝ 6-րդ և 5-րդ հարկերի միջև: Այնուհետև դուրս է եկել բակ, իսկ մեկ րոպե հետո արդեն հայտնվել է Սադովոյե Կոլցոյում սպասող մեքենայի մեջ:

Հանցագործության վայրում ոստիկանության աշխատակիցները գտել են նաև ատրճանակի մի քանի դատարկ պարկուճ, որոնք թողել են Ուսոյանի թիկնապահները տարբեր ուղղություններով պատասխան անկանոն կրակ բացելուց հետո:

Այժմ քննիչները փորձում են հարցաքննել քրեական հեղինակության թիկնապահներին, որոնցից Ասլան Ուսոյանը /Դեդ Հասանը/ չէր բաժանվում ոչ մի վայրկյան: