Փաստ ինֆո

Էթիկայի հարցերով Ազգային ժողովի ժամանակավոր հանձնաժողովը հունվարի 17-ի դռնփակ նիստում կայացրել է իր վարույթում գտնվող երեք դիմումների հետ կապված աշխատակարգային որոշումներ: Մասնավորապես` հաստատվել է դիմումներում բարձրացված հարցերով նիստերի անցկացման ժամանակացույցը: Այս մասին այսօրվա նիստից հետո լրագրողներին հայտնեց հանձնաժողովի նախագահ Նիկոլ Փաշինյանը:

Նա նշեց նաև, որ դիմումների քննարկման ընթացքն ապահովելու համար հաջորդ շաբաթվա ընթացքում, ըստ ամենայնի, կհրավիրվեն մի քանի նիստեր: «Շատ ծավալուն աշխատանք է, ժամկետներով կաշկանդված ենք և պետք է տեղավորվենք այդ ժամկետների մեջ»,-ընդգծեց Ն.Փաշինյանը` հավելելով.

«Առաջիկա նիստերն արվելու են այն նպատակով, որպեսզի այն պատգամավորները, ում վերաբերվում են դիմումները, հրավիրվեն, և հանձնաժողովը լսի նրանց պարզաբանումները»:

Ի պատասխան «Pastinfo.am»-ի թղթակցի հարցին` հանձնաժողովի նախագահը նշեց, որ կարելի է արձանագրել, որ բոլոր հարցերի քննությունն ընթանում է սահմանված ընթացակարգով: Ամենածավալունը ՀՅԴ խմբակցության ղեկավար Արմեն Ռուստամյանի դիմումում բարձրացված հարցն է, որի կապակցությամբ նշանակված է հանձնաժողովի որոշում կայացնելու նիստի օրը` փետրվարի 1-ը: Ըստ նրա, սակայն, մինչև այդ հանձնաժողովը մի քանի նիստեր կգումարի:

Ինչպես «Pastinfo.am»-ն ավելի վաղ տեղեկացրել էր, 2012թ.-ի դեկտեմբերի 7-ին հանձնաժողովը քննության է վերցրել Ա.Ռուստամյանի դիմումը` նոյեմբերի 21-ին հրավիրված ԱԺ-ի արտահերթ նիստին չգրանցված 83 պատգամավորների կողմից ԱԺ կանոնակարգ-օրենքով սահմանված էթիկայի կանոնները խախտելու վերաբերյալ հարցը քննելու և համապատասխան որոշում կայացնելու խնդրանքով:

Դեկտեմբերի 21-ից սկսված է ԱԺ «Բարգավաճ Հայաստան» խմբակցության անդամ Միքայել Մելքումյանի վարքագծի վերաբերյալ «Ռազմավարական մշակումներ կենտրոն» ՀԿ-ի, իսկ դեկտեմբերի 28-ից` ԱԺ պատգամավոր Մհեր Սեդրակյանի և «Ա1+»-ի լրագրող Մհեր Արշակյանի միջև խորհրդարանում տեղի ունեցած միջադեպի վերաբերյալ «Թրանսփարենսի Ինթերնեշնլ» կազմակերպության դիմումների քննությունը:

Ա.Ռուստամյանի և «Թրանսփարենսի Ինթերնեշնլ» կազմակերպության դիմումներում բարձրացված հարցերի քննարկման և դրանց վերաբերյալ հանձնաժողովին եզրակացություն ներկայացնելու նպատակով հանձնաժողովի ներկայացուցիչ է նշանակված «Ժառանգություն» խմբակցության անդամ Զարուհի Փոստանջյանը, իսկ «Ռազմավարական մշակումներ կենտրոն» ՀԿ-ի դիմումի կապակցությամբ` ՀՅԴ պատգամավոր Արծվիկ Մինասյանը:

ԱԺ կանոնակարգ-օրենքի համաձայն, Էթիկայի հանձնաժողովը հարցի քննությունն ավարտում է դիմումում բարձրացված հարցի քննությունը սկսելու վերաբերյալ իր որոշման կայացման օրվանից հետո` 30 աշխատանքային օրվա ընթացքում: Այդ ժամկետը կարող է Էթիկայի հանձնաժողովի որոշմամբ երկարաձգվել մինչև 20 օրով, եթե հարցի քննության համար էական համարվող հանգամանքներ պարզելու նպատակով անհրաժեշտություն է առաջացել լրացուցիչ տեղեկություններ կամ փաստաթղթեր ձեռք բերել և հարցի քննության մնացած ժամկետում հնարավոր չէ ըստ էության որոշում կամ եզրակացություն ընդունել: