Փաստ ինֆո

Ոստիկանի նկատմամբ կյանքի կամ առողջության համար ոչ վտանգավոր բռնություն գործադրելու համար մեկ տարվա ազատազրկման դատապարտված Արման Բարսեղյանն ու նրա պաշտպան Կարեն Թումանյանը ՀՀ վերաքննիչ քրեական դատարանին միջնորդել են կայացնել արդարացման դատավճիռ: Նման դատավճիռ չկայացնելու դեպքում, որպես պահեստային տարբերակ, կողմը միջնորդում է նշանակել պատիժ տուգանքի ձևով կամ նշանակել պայմանական ազատազրկման ձևով պատիժ:

Ըստ մեղադրանքի, Արման Բարսեղյանը 07.04.2012թ. 22.00-ի սահմաններում ընկերների՝ Վալտեր Սողոյանի և Մերուժան Գալոյանի հետ, իր «Գոլֆ» մակնիշի ավտոմեքենան փորձել է կայանել Վանաձոր քաղաքի Սուրբ Աստվածածին եկեղեցու մուտքի դարպասների դիմաց։ Նշյալ օրը՝ Սուրբ Զատիկի տոնի կապակցությամբ, եկեղեցու տարածքում հասարակական կարգի պահպանություն իրականացնող ոստիկանության Վանաձոր բաժնի Բազումի բաժանմունքի ավագ օպերլիազոր Վահե Բարսեղյանը Արման Բարսեղյանին արգելել է մեքենան կայանել եկեղեցու տարածքում։ «Արման Բարսեղյանը Վահե Բարսեղյանի նկատմամբ բռնություն գործադրելու սպառնալիքներ է տվել, սպառնացել է կյանքից զրկել՝ «սատկացնել», ապա ավտոմեքենան վարել է նրա ուղղությամբ»,- նշվում է մեղադրական եզրակացության մեջ։

Ինչպես նախաքննության, այնպես էլ դատաքննության ընթացքում Արման Բարսեղյանը իրեն մեղավոր չի ճանաչել: Ըստ նրա, ոստիկանը «կոպիտ ձևով է խոսել», իսկ ինքը նրան ասել է՝ «եթե պագոններդ վրեդ չլիներ, ապա ուրիշ ձևով կխոսեի քո հետ», ինչին ոստիկանը պատասխանել է «դե խոսա, այ լակոտ» արտահայտությամբ:

2012թ. հոկտեմբերի 23-ի դատավճռով Լոռու մարզի ընդհանուր իրավասության դատարանը՝ դատավոր Մարինե Մելքոնյանի նախագահությամբ, 1989թ. ծնված, «Ռոշեն» ՍՊԸ-ի մենեջեր Արման Բարսեղյանին մեղավոր է ճանաչել ՀՀ Քրեական օրենսգրքի 316-րդ հոդվածի 1-ին մասով՝ Իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը, և դատապարտել ազատազրկման 1 տարի ժամկետով:

Դատարանը գտել է, որ ամբաստանյալ Արման Բարսեղյանի վերոհիշյալ պատճառաբանությունները անհիմն են և նպատակ են հետապնդում խուսափել քրեական պատասխանատվությունից և պատժից, նրա կողմից իշխանության ներկայացուցչի` Վահե Բարսեղյանի նկատմամբ բռնություն գործադրելու սպառնալիքի համար առաջադրված մեղադրանքը հիմնավորվել է քրեական գործով ձեռք բերված ապացույցներով:

Ամբաստանյալի նկատմամբ պատիժ նշանակելիս դատարանը հաշվի է առել նրա կատարած արարքի բնույթն ու հասարակական վտանգավորության աստիճանը, շարժառիթը, հետևանքը, հանցագործության տարածվածությունը, ամբաստանյալի անձը բնութագրող տվյալները, պատասխանատվությունը և պատիժը մեղմացնող կամ ծանրացնող հանգամանքները, նկատի ունենալով այն, որ քրեական պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները: