Փաստ ինֆո

Էթիկայի հարցերով Ազգային ժողովի ժամանակավոր հանձնաժողովը հունվարի 17-ի դռնփակ նիստում մերժեց «Կանանց Ռեսուրսային Կենտրոն» ՀԿ-ի դիմումը:

Ինչպես նիստից հետո լրագրողներին հայտնեց հանձնաժողովի նախագահ Նիկոլ Փաշինյանը, հանձնաժողովը հիմնավոր չի համարել դիմումում բերված փաստարկները` պատգամավոր Հայկ Բաբուխանյանի կողմից էթիկայի կանոնները խախտելու վերաբերյալ:

Ինչպես «Pastinfo.am»-ն ավելի վաղ հայտնել էր, ՀԿ-ի` հանձնաժողովին ուղղված դիմումը վերաբերում է ԱԺ ՀՀԿ խմբակցության անդամ, «Սահմանադրական իրավունք» միության նախագահ Հայկ Բաբուխանյանի կողմից էթիկայի կանոնների խախտմանը: Մասնավորապես, պատգամավորը, հանդիսանալով նաև «Իրավունք Մեդիա» հոլդինգի խմբագրական խորհրդի նախագահ, սատարել է հոլդինգի մաս կազմող Zaruhi.com ամսագրում և «Իրավունք» թերթում ՀԿ-ի դեմ զրպարտչական նյութեր տպագրելուն:

«Մենք պետք է տեսնենք, թե ինչպիսի հիմնավորումներ կան առ այն, որ պատգամավորը խախտել է էթիկայի կանոնները: Մենք դիմումում օրենսդրությամբ նախատեսված այդպիսի հիմնավորումներ չենք գտել, որովհետև մենք չենք կարող քննարկել լրատվամիջոցի, որևէ հիմնարկության գործ, մենք կարող ենք քննարկել բացառապես պատգամավորի գործողությունները»,- ի պատասխան «Pastinfo.am»-ի թղթակցի հարցին ասաց Ն.Փաշինյանը:

Հանձնաժողովի նախագահը նշեց նաև, որ իրենց կողմից ՀԿ-ի դիմումի մերժման ամենակարևոր հիմնավորումներից մեկն էլ Սահմանադրության 66-րդ հոդվածով ամրագրված դրույթն է, համաձայն որի պատգամավորն իր պատգամավորական լիազորությունների ժամկետում և դրանից հետո չի կարող հետապնդվել և պատասխանատվության ենթարկվել պատգամավորի՝ իր կարգավիճակից բխող գործողությունների, այդ թվում՝ Ազգային ժողովում հայտնած կարծիքի համար, եթե այն զրպարտություն կամ վիրավորանք չի պարունակում: «Իսկ վիրավորանք և զրպարտություն կա թե չէ` դա արդեն լրիվ ուրիշ ինստիտուտի որոշելու խնդիրն է: Մենք բացառապես էթիկայի կանոնների հարց ենք քննարկում»,-ընդգծեց Էթիկայի հանձնաժողովի նախագահը: