Փաստ ինֆո

ՌԴ ՆԳ մամլո ծառայությունը հաստատել է, որ Մոսկվայի կենտրոնում փոխհրաձգության ժամանակ վիրավորված քրեական հեղինակություն Ասլան Ուսոյանը, որը հայտնի է Դեդ Հասան անունով, վախճանվել է:

Ինչպես հաղորդում են ռուսական լրատվական գործակալությունները, հրաձգությունը տեղի է ունեցել Պովարսկու փողոցում:

«Վիրավորվելուց հետո նա տեղափոխվել է բժշկական հաստատություն, որտեղ էլ մահացել է»,- մեջբերում է «РИА Новости»-ն ՆԳ նախարարության ներկայացուցչի խոսքը:

BBC-ն նշում է, որ սա Ուսոյանի դեմ երկրորդ մահափորձն է: Նրան ռուս փորձագետները համարում են հետսովետական տարածքի ամենախոշոր քրեական հեղինակությունը:

Նախկին մահափորձը տեղի էր ունեցել 2010թ. սեպտեմբերի 15-ին: Այդ ժամանակ անհայտ մարդասպանները ներխուժել էին Տվերյան փողոցում գտնվող նրա բնակարան և կրակ բացել: Ուսոյանը մի քանի վերք էր ստացել փորի հատվածում: Այդ ժամանակ նրա հետ միասին վիրավորվել էր նաև նրա թիկնապահը՝ Արթուր Բաղրամյանը:

Առաջին մահափորձի առիթով «Ինտերֆաքս»-ի միջոցով ռուսական իրավապահ ծառայությունների մի աշխատակից նշել էր, որ Ուսոյանի դեմ մահափորձը իր արձագանքով գերազանցում է Յապոնչիկ մականունով Վյաչեսլավ Իվանկովի դեմ կատարված մահափորձին:

Անցյալ տարի հոկտեմբերին Իվանկովի թաղման ժամանակ Ուսոյանի անունից շիրիմին դրվեց մի ծաղկեպսակ, որտեղ գրված էր «Սիրելի եղբորս»:

«Ինտերֆաքս»-ի այդ նույն աղբյուրը տեղեկացրել էր նաև, որ Իվանկովի և Ուսոյանի դեմ կատարվող մահափորձերն ունեն պատվերի ընդգծված բնութագիր:

Ըստ որոշ տեղեկությունների Դեդ Հասանը և Յապոնչիկը կոնֆլիկտի մեջ են եղել մի քրեական խմբավորման հետ և Ուսոյանը երդվել էր լուծել Իվանկովի մահվան վրեժը:

Լուսանկարը՝ criminalnaya.ru կայքից