Փաստ ինֆո

2012 թվականի դրությամբ,  ՀՀ դատարանների նախագահների խորհրդի էթիկայի հանձնաժողովը ստացել է հաղորդում   78 դատավորի վերաբերյալ, որոնցից քննարկման արժանի է եղել 43 դիմում:  2011 թվականի համեմատությամբ Էթիկայի հանձնաժողով ստացված դիմումների քանակը կրկնապատկվել է:

«SIGMA կառավարման բարելավման աջակցություն» միջազգային կազմակերպության «Էթիկայի հանձնաժողովներին մասնագիտական աջակցություն» ծրագրի ղեկավար Խավիեր Սիստերնասի գլխավորած պատվիրակության հետ այսօրվա հանդիպմանը ՀՀ վճռաբեկ դատարանի քրեական պալատի նախագահ, ՀՀ դատարանների նախագահների խորհրդի էթիկայի հանձնաժողովի նախագահ Դավիթ Ավետիսյանը հայտնել է նաև, որ հանձնաժողովի կողմից դատավորների վերաբերյալ կայացվել է 56 որոշում (կան դատավորներ, որոնց վերաբերյալ մեկից ավելի հաղորդում է ստացվել):  Հանձնաժողովը 8 դեպքով գտել է, որ թույլ տրված խախտումը կոպիտ է կամ պարբերական բնույթ ունի և փոխանցել է ՀՀ արդարադատության խորհրդի կարգապահական հանձնաժողով:  4 դեպքով գործերի քննությունն ընթացքի մեջ է:

Հանձնաժողովը 35 դեպքում գտել է, որ առկա է խախտում և բավարարվել է հարցի քննարկմամբ: Դեպքերից 13-ով խախտում չի արձանագրել:

Խախտումների վերաբերյալ տեղեկությունները Հանձնաժողովում ստացվել են առաջին հերթին Դատական դեպարտամենտի կողմից ամենամյա ուսումնասիրության և արդյունքների ամփոփման արդյունքում, երկրորդ՝ քաղաքացիների և երրորդ՝ պետական մարմինների կողմից: Հանձնաժողովը կարող է  որոշումներ ընդունել  դատավորի վարքագծի կանոնի խախտման բացակայության կամ  առկայության մասին: Խախտման առկայության դեպքում  կարող է  բավարարվել  հարցի քննարկմամբ, իսկ եթե դատավորի վարքագծի կանոնի խախտումը կոպիտ է կամ կրում է պարբերական բնույթ, ապա հարցի քննարկումը տեղափոխվում է ՀՀ արդարադատության խորհրդի կարգապահական հանձնաժողով:

Դ.Ավետիսյանը հավաստիացրել է, որ քաղաքացիների համար Էթիկայի հանձնաժողով դիմելու ընթացակարգը շատ հեշտ է. դիմումներն ստացվում են և՛ փոստային, և՛ էլեկտրոնային փոստի միջոցով, սակայն չեն քննարկվում անանուն հաղորդումները:

Ըստ «www.court.am» պաշտոնական կայքէջի,  Խավիեր Սիստերնասը և նրա գլխավորած պատվիրակությունը հետաքրքրված են եղել  Հայաստանի Հանրապետության դատարանների նախագահների խորհրդի էթիկայի հանձնաժողովի կատարած և նախատեսվող աշխատանքով, ունեցած ձեռքբերումներով:

Պատվիրակության ղեկավար  Խավիեր Սիստերնասը, ըստ պաշտոնական աղբյուրի,  նշել է, որ  ՀՀ ԴՆԽ էթիկայի հանձնաժողովը մեծ աշխատանք է կատարել, և նրա փորձը կարող է ուսանելի լինել: