Փաստ ինֆո

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում, դատավոր  Արմեն Խաչատրյանի նախագահությամբ, այսօր շարունակվեց Սուրեն Սուրենյանցի նկատմամբ հարուցված քրեական գործի դատաքննությունը: Դատական նիստին ներկա էին  Ս. Սուրենյանցը, նրա պաշտպան Կարապետ Գալստյանը, տուժող Գրիգոր Ղասաբյանը, իսկ քիչ ուշացումով նաև դատարան ներկայացավ Ղասաբյանի դուստր՝ Պերճուհի Ղասաբյանը:

Ինչպես արդեն տեղեկացրել էինք Սուրենյանցը դատական նիստից առաջ վերադարձրել էր Ղասաբյանի պարտքը: Տուժողը դատարանում հայտարարեց, որ այլևս ամբաստանյալից  պարտք ու պահանջ չունի և որ իրենք լավ ընկերներ են:

Տուժողը ցուցմունք տալու ժամանակ նշեց, թե Սուրենյանցը իրենից պարտք է խնդրել սկզբում 1000 ԱՄՆ դոլլար, այնուհետև 110 000 դրամ, որպեսզի տուժողի  աղջիկը մասնակցի Ամերիկյան համալսարանում դասընթացներին, այնուհետև տվել է 71 եվրո գումար,  որպեսզի  դուստրը մեկնի Ֆրանսիա` դասընթացների մասնակցելու նպատակով: Մեղադրող կողմը տուժողի ցուցմունքում հակասություններ նկատելով միջնորդեց հրապարակել նրա նախաքննական ցուցմունքը: Նախաքննության ժամանակ տուժողը հայտնել էր, որ Սուրենյանցը իրենից 1000 ԱՄՆ դոլար է վերցրել թղթի գործ սկսելու համար: Տուժողի դուստր Պերճուհի Ղասաբյանն էլ դատարանում ցուցմուն  տալու ժամանակ նշեց, որ ընդհանապես չի ճանաչում Սուրեն Սուրնյանցին և վերջինիս առաջին անգամ է տեսել դատարանում:

Իսկ Սուրենյանցը դատարանին հայտնեց, որ իրականում ցանկացել է զբաղվել թերթի թղթի ներմուծմամբ, սակայն երբ հաշվարկել է, թե որքան գումար է հարկավոր գործը սկսելու և շահույթ ստանալու համար հասկացել է, որ այդ գործը շահույթ չի բերի և հրաժարվել է այդ գաղափարից, սակայն վերջինս խոստովանեց, որ իր թափթփվածության, ինչպես նաև առողջական խնդիրներից ելնելով չի կարողացել վերադարձնել Ղասաբյանի պարքը:

Սուրեն Սուրենյանցը միջնորդեց վկայություն տալու համար դատարան հրավիրել նաև այն քննիչին, ում թելադրանքով  գրել է նախաքննության ընթացքում տված ցուցմունքը, սակայն դատարանը մերժեց միջնորդությունը:

Աշխատանքային ժամի ավարտի պատճառով նիստը հետաձգվեց և հաջորդ նիստը տեղի կունենա  հունվարի 18-ին:

Լուսանկարն` ըստ Ֆոտոլուրի