Փաստ ինֆո

Կենտրոնական ընտրական հանձնաժողովն այսօրվա նիստում քննարկեց 5 քառակուսի մետրը գերազանցող արտաքին գովազդային վահանակներում քարոզչական պաստառներ փակցնելու իրավունքը Հանրապետության Նախագահի թեկնածուների միջև բաշխելու հարցը:

Սահմանված ժամկետում` մինչև հունվարի 4-ը, վահանակներում քարոզչական պաստառներ տեղադրելու հայտեր ներկայացրել էին թեկնածուներից միայն 6-ը` ՀՀ գործող Նախագահ, ՀՀԿ առաջնորդ Սերժ Սարգսյանը, «Ազատություն» կուսակցության նախագահ, ԱԺ պատգամավոր Հրանտ Բագրատյանը, «Ազգային ինքնորոշում միավորում» կուսակցության նախագահ Պարույր Հայրիկյանը, «Ազգային համաձայնություն» կուսակցության նախագահ Արամ Հարությունյանը, «Ժառանգություն» կուսակցության նախագահ Րաֆֆի Հովհաննիսյանը, «Ռադիո Հայ» ՍՊԸ ժողովի նախագահ Անդրիաս Ղուկասյանը:

Ա.Հարությունյանը, սակայն, հունվարի 15-ին դիմումով հրաժարվել էր իր հայտից, ուստի ԿԸՀ-ն մինչև բաշխումը նախ քննարկեց թեկնածուի դիմումը և բավարարեց այն: Արդյունքում` ԿԸՀ-ն բաշխեց 5 քառակուսի մետրը գերազանցող արտաքին գովազդային վահանակներում քարոզչական պաստառներ փակցնելու իրավունքը մնացած 5 թեկնածուների միջև:

Ինչպես հայտնեց ԿԸՀ քարտուղար Արմեն Սմբատյանը, հանրապետության բնակավայրերում և մայրուղիներում քարոզչական պաստառներ տեղադրելու համար տնտեսվարող սուբյեկտների կողմից առաջարկված էին 410 վահանակներ, որոնցից 138-ի վերաբերյալ թեկնածուներից հայտեր չէին ստացվել:

Թեկնածուներն ընդհանուր առմամբ ներկայացրել էին 522 վահանակի վերաբերյալ հայտեր:

145 վահանակների վերաբերյալ ներկայացվել էր միայն մեկ հայտ, ուստի պաստառներ փակցնելու իրավունքը վերապահվեց միակ հայտը ներկայացրած թեկնածուներին. Հ. Բագրատյան` 1, Պ. Հայրիկյան` 7, Ր. Հովհաննիսյան` 114, Ա. Ղուկասյան` 11, Ս. Սարգսյան` 12:

Մնացած 127 վահանակների և դրանց կողմերի վերաբերյալ թեկնածուները ներկայացրել էին մեկից ավելի հայտեր, ուստի դրանք առանձնացվեցին որպես մրցակցային վահանակներ: ԿԸՀ-ն դրանք թեկնածուների միջև բաշխեց՝ ապահովելով հավասար բավարարման սկզբունքը: Յուրաքանչյուր թեկնածուին հասանելիք վահանակների կողմերի քանակի հաշվառմամբ իրականացվեց էլեկտրոնային վիճակահանություն: Միևնույն վահանակի երկու կողմերը բաժին ընկան տարբեր թեկնածուների:

Ըստ այդմ, մրցակցային ճանաչված 127 վահանակների 213 կողմերը բաշխվեցին հետևյալ կերպ. Հ. Բագրատյան` 13, Պ. Հայրիկյան` 26, Ր. Հովհաննիսյան` 79, Ա. Ղուկասյան` 35, Ս.Սարգսյան`60:

Ընտրական օրենսգրքի համաձայն, ԿԸՀ-ի որոշման հիման վրա, թեկնածուներն արտաքին գովազդային վահանակը տնօրինող կազմակերպության հետ կկնքեն պայմանագիր` քարոզչական պաստառը փակցնելու համար: ԿԸՀ-ի որոշումն ուժի մեջ մտնելուց հետո` եռօրյա ժամկետում, թեկնածուի կողմից պայմանագիր չկնքվելու դեպքում գովազդային վահանակը տնօրինողն ազատ է կնքելու այլ պայմանագիր:

Վահանակների քանակի, մակերեսների, դրանց գտնվելու վայրերի և վարձավճարների վերաբերյալ ԿԸՀ-ի պաշտոնական կայքէջում տեղադրված տեղեկատվության համաձայն, մասնավորապես, Երևանում 1 քառակուսի մետրի ամսական վարձավճարը հիմնականում 6-8 հազար դրամ է: Սակայն, օրինակ, ընկերություններից մեկի կողմից մայրաքաղաքի կենտրոնում, 6 վայրերում, որոնց թվում են Աբովյան 34-ը («Փարիզյան սուրճ» սրճարանի դիմաց), Աբովյան հրապարակը, Պարոնյան-Մաշտոց խաչմերուկը, 11, 18 և 36 քառակուսի մետր մակերեսով վահանակների 1 քմ տրամադրման արժեքը մեկ ամսվա համար սահմանված է 11 հազար դրամ:

Մարզերի բնակավայրերում և միջպետական մայրուղիներում 1 քմ-ի գները տատանվում են 3,5-7 հազար դրամի սահմաններում: