Փաստ ինֆո

2012թ. ընթացքում ‹‹Դինո Գոլդ Մայնինգ Քամփնի» ՓԲ ընկերության թափուկատար խողովակաշարն ընդհանուր առմամբ վթարվել է երեք անգամ, եւ տեղի է ունեցել արտահոսքի 3 դեպք: Սա պարզել է ոստիկանությունը կատարված ուսումնասիրությունների արդյունքում:

Վերջին վթարը տեղի է ունեցել 2012թ. դեկտեմբերի 1-ին, որից հետո ընկերության գլխավոր տնօրեն Ի.Գարկովը 2012թ. դեկտեմբերի 4-ին Սյունիքի մարզի դատախազություն է ուղարկել գրություն, որը մարզի դատախազն ուղարկել է ՀՀ ոստիկանության Կապանի բաժին` հանձնարարելով նախապատրաստել նյութեր:

Նյութերի  ուսումնասիրությամբ մասնավորապես պարզվել է, որ 2012թ. դեկտեմբերի 1-ին Կապան-Մեղրի այլընտրանքային ճանապարհի 2-րդ կիլոմետրով անցնող ‹‹Դինո Գոլդ Մայնինգ Քամփնի» ՓԲ ընկերության պոչատար խողովակաշարի վթարման հետևանքով ընկերության հարստացուցիչ ֆաբրիկայի հարստացման պոչանքները բարձր ճնշման հետևանքով թիվ 19 կոմպենսատորից առաջացած ճեղքվածքից դուրս են մղվել շրջակա միջավայր, լցվել նշված ճանապարհի ջրահեռացման առուն, հոսել որոշակի հեռավորության վրա եւ դուրս գալով առվից` լցվել Գեղանուշ գետը: Պարզվել է նաև, որ այդ վթարը միակ դեպքը չի եղել  և 2012թ. ընթացքում պոչամբարի վթարի երեք դեպք է գրանցվել, որի վերաբերյալ նյութերը  կցվել են 2012 թվականի դեկտեմբերի 1-ին տեղի ունեցած վթարի կապակցությամբ նախապատրաստվող նյութերին` համատեղ ընթացք տալու համար:

‹‹Փաստինֆո» գործակալության ունեցած տեղեկությունների համաձայն,  ոստիկանությունը բացատրություններ է վերցրել ոչ միայն  հարստացուցիչ ֆաբրիկայի համապատասխան ղեկավար աշխատողներից, այլ նաեւ մյուս աշխատակիցներից, որոնց թվում են խողովակաշարը սպասարկողներն ու  փականագործները:

Հաշվարկվել է շրջակա միջավայրին պատճառված վնասի չափը, որը ՀՀ բնապահպանության նախարարության աշխատակազմի բնապահպանական պետական տեսչության Սյունիքի տարածքային բաժնի ուսումնասիրություններով կազմել է 2.004.800 ՀՀ դրամ:

Նյութերով նշանակվել են էկոլոգիական և տեխնիկական փորձաքննություններ, որոնց արդյունքում էլ թերեւս պարզ կդառնա  վթարի իրական պատճառը։