Փաստ ինֆո

Գերմանական Շտուտգարդ քաղաքում շուտով կսկսվի լրտեսության մեջ մեղադրվող ռուս ամուսնական զույգի նկատմամբ դատավարությունը: Քննության վարկածով, նրանք Գերմանիայում անլեգալ հետախույզի կարգավիճակով սկսել են աշխատել դեռևս 1980-ական թվականներից:

Հաղորդվում է, որ ռուսները Գերմանիա են ժամանել ավստրիական կեղծ անձնագրերով՝ Անդրեա և Հայդրուն Անշլագներ անունով: Մեղադրյալների իրական անունները հայտնի չեն:

Դատախազության տվյալներով, ավելի քան 20 տարվա ընթացքում, նրանք սկզբում սովետական, ապա ռուսական իշխանություններին են հաղորդել գաղտնի տեղեկություններ ՆԱՏՕ-ի և Եվրամիության գործունեության մասին: Բացի այդ նրանք խորհրդատվություն են տրամադրել Ռուսաստանի արտաքին հետախուզությանը Գերմանիայի քաղաքականության և պաշտպանության հարցերի մասին:

Գերմանական մամուլը նույնիսկ հաղորդագրություններ է տարածել, որ Մոսկվան և Բեռլինը փորձել են համաձայնության գալ ձերբակալվածներին արևմուտքի օգտին աշխատած և ձերբակալված երկու ռուսների հետ փոխանակելու հարցի շուրջ: Սակայն, այդ բանակցությունները հաջողությամբ չեն պսակվել:

Գերմանիայում անլեգալ ամուսինների այս գործը համարում են ամենաաղմկահարույց լրտեսական պատմությունը՝ բեռլինյան պատի խորտակումից ի վեր:

Քրեական գործի նյութերում նշվում է, որ 2009թ.-ին Անդրեաս Անշլագը հավաքագրել է հոլանդացի դիվանագետ Ռայմոնդ Վալենտինո Պուտերայային, ումից նա գնել է ՆԱՏՕ-ի և ԵՄ-ի վերաբերյալ փաստաթղթեր: Համագործակցության համար գործակալները նրան մուծել են ընդհանուր առմամբ 72 հազար եվրո:

«Welt» թերթի տվյալներով հոլանդացի պաշտոնյայից ստացված տեղեկատվությունը վերաբերել է Եվրոպայում հակահրթիռային պաշտպանության համակարգին, ՆԱՏՕ-ի կառուցվածքային բարեփոխումներին, ինչպես նաև դաշինքի մասնակցությանը Կոսովոյի, Աֆղանստանի և Լիբիայի կոնֆլիկտներին:

Անդրեաս Անշլագը նաև Ռուսաստանի անվտանգության ծառայությանն է ուղարկել երաշխավորություններ գաղտնիքներ կրող պաշտոնյաների և նրանց հավաքագրելու վերաբերյալ, հայտարարում են դատախազները:

Անշլագ ամուսինները գերմանական հակահետախուզության տեսադաշտում հայտնվել են 2011թ. օգոստոսին՝ ամերիկյան հատուկ ծառայությունների օժանդակությամբ:

BBC-ն նշում է, որ այս պատմության ինտրիգը առավել սրվում է նաև այն առումով, որ հետախույզ ամուսինները Գերմանիայի տարածք են ներթափանցել այն ժամանակ, երբ այնտեղ նախկին ԿԳԲ-ի աշխատակից, իսկ այսօր ՌԴ նախագահ Վլադիմիր Պուտինը իր ծառայությունն էր կատարում՝ քողարկվելով Դրեզդենի ԽՍՀՄ-ԳԴՀ բարեկամության տան տնօրենի պաշտոնով: Այս առումով լրատվական գործակալությունը նշում է, որ Ռուսաստանի արտաքին հետախուզության ծառայությունում չեն մեկնաբանում ռուս ենթադրյալ լրտեսներին հասցեագրված մեղադրանքները:

Նրանց պաշտպանությունը գերմանական դատարանում ստանձնել է փաստաբան Հորստ-Դիտեր Պետչկեն, ով անցյալում դատարանում ներկայացրել է նախկին ԿԳԲ-ի և «Շտազի»-ի գործակալների շահերը:

Ըստ փաստաբանի, թեև մեղադրական եզրակացությունը կազմում է 137 էջ, այնուամենայնիվ քննությունը պատճառ չունի ռուսներին առանձնահատուկ ծանր հանցանքների մեջ մեղադրելու համար:

ԶԼՄ-ներին տրված հարցազրույցում փաստաբանը վստահություն է հայտնել, որ, այնուամենայնիվ, դատավճռի հրապարակումից հետո գերմանական և ռուսական հատուկ ծառայությունները կգան համաձայնության ձերբակալվածների փոխանակության հարցում:

Ինչպես և սպասվում է, նշում է BBC-ն, դատը կավարտվի ամռանից ոչ շուտ: Օրենքով ամուսիններին սպառնում է 10 տարվա ազատազրկում: