Փաստ ինֆո

Եգիպտոսում՝ Գիզայի մերձակայքում, Էլ-Բադրաշին երկաթուղային կայանից ոչ հեռու, անհայտ պատճառներով, անցած գիշեր գծից դուրս է ընկել զորակոչիկներ տեղափոխող գնացքը: Ըստ BBC-ի՝ պատահարի հետևանքով, համաձայն վերջին տվյալների, 19 մարդ զոհվել է, իսկ 107-ը մարմնական տարբեր վնասվածքներով տեղափոխվել է հիվանդանոց:

Եգիպտական «Ալ-Ախրամ» թերթի հրապարակած տվյալների համաձայն՝ 12 վագոններից կազմված գնացքը տեղափոխելիս է եղել 1300 նորակոչիկների: Գծից դուրս եկած վագոնում եղել է 200 մարդ:

Եգիպտոսի երկաթուղու նոր ղեկավարի՝ Հուսեին Զաքարիի ասելով վթարի ենթարկված գնացքը դուրս թռչելով գծերից՝ բախվել է բեռնատար գնացքին:

BBC-ն հաղորդում է, որ եգիպտական երկաթուղին, հաճախակի պատահող վթարների պատճառով, անփառունակ համբավ է ձեռք բերել:

Հիշեցնենք, որ դեռևս անցած տարվա նոյեմբերին երկրի կենտրոնական հատվածում՝ Կահիրեից 350 կմ հարավ, 50 դպրոցականներ զոհվեցին այն բանից հետո, երբ նրանց տեղափոխող ավտոբուսը բախվեց գնացքին: Այդ վթարի հիմնական պատճառն այն էր, որ գծային լուսացույցի համար պատասխանատուն քնած էր եղել այն պահին, երբ գնացքն անցնելիս էր եղել ավտոտրանսպորտային և երկաթուղային ճանապարհների խաչմերուկով:

Այդպիսի մի դեպք էլ տեղի էր ունեցել 4 տարի առաջ: Երկու մարդատար գնացքներ բախվել էին միմյանց՝ խլելով 18 մարդկային կյանք: Իսկ 2002թ.-ին Կահիրեում, գնացքում բռնկված հրդեհի պատճառով, զոհվել էր 373 մարդ:

Ընդամենը վերջերս՝ 10 օր առաջ Եգիպտոսի տրանսպորտի նախարար նշանակված Հատիմ Աբդուլատիֆը ասել է, որ «Մենք պետք է խոստովանենք, որ երկաթգծերի ցանցը խարխլվում է: Մենք հետաքննություն կանցկացնենք, որպեսզի պարզենք, թե արդյոք միջադեպը պատահել է գնացքի կամ երկաթգծի թերությունների պատճառով, թե եղել են այլ պատճառներ»: