Փաստ ինֆո

Թերթը գրում է, որ դեռ վաղ է վերջակետ դնել Մատաղիսի գործում՝ նշելով, որ հունվարի 14-ին տեղի ունեցած մամուլի ասուլիսի ժամանակ Գոհար Մելքոնյանը և Արթուր Եղիազարյանը՝ տուժած Ռոման Եղիազարյանի մայրը և մորեղբայրը, հնչեցրել են նոր վարկածներ:

Ռ. Եղիազարյանի հրազատները հայտարարել են, որ առաջին ատյանի դատարանի դատավճիռն անօրինական է և որ արդեն բողոքարկել են վերաքննիչ դատարան: Միաժամանակ տուժածների իրավահաջորդները միանգամայն համամիտ են մեղադրող կողմի դիրքորոշման հետ և կարծում են, որ Ա. Զալյանի, Ռ. Սարգսյանի և Մ. Սերոբյանի տեղը ճաղերի ետևում է:

Մամուլի ասուլիսի ժամանակ մեղադրանքներ են հնչել ՀՀ ԱԺ պատգամավոր Զարուհի Փոստանջյանի հասցեին, որն, ինչպես հայտնի է, լինելով փաստաբան, հենց ամենասկզբից պաշտպանել է մեղադրյալներին:

Հայտարարվել է, որ նրա թիկունքում կանգնած են այլ մարդիկ, որոնցից մեկն էլ «Ժառանգություն» կուսակցության առաջնորդ Րաֆֆի Հովհաննիսյանն է:

Գ. Մելքոնյանը հայտնել է, որ տարբեր մարդիկ փորձել են նրան կաշառել, բայց իր որդու արյան գնով ինքն առևտուր չի անում: Իսկ ինչ վերաբերում է Ռևազյանի հարազատներին, ապա նրանք, ըստ Ռ. Եղիազարյանի հարազատների, կաշառված են, ինչով էլ բացատրվում է նրանց դիրքորոշումը:

Զարուհի Փոստանջյանը, ի պատասխան վերն ասվածի, ասել է, որ պաշտպանների դիրքորոշումը պարզ կդառնա, երբ պարզ կլինի զինվորական դատախազության դիրքորոշումը:

Իսկ զինդատախազ Գ. Կոստանյանը, մեկնաբանելով ստեղծված իրավիճակը, նշել է, որ իր համար անսպասելի ոչինչ տեղի չի ունեցել. «Դա էդպես էլ պետք է լինի: Տուժածների դիրքորոշումը գնահատվում է որպես լիովին իրավաչափ երևույթ: Այդ մարդիկ հնարավոր բոլոր միջոցներով փորձում են պաշտպանել իրենց իրավունքները: Ես սպասում էի, որ գործը կշարունակվի և՛ Վերաքննիչ, և՛ Վճռաբեկ դատարաններում»,- ասել է զինդատախազ Գ. Կոստանյանը: