Փաստ ինֆո

«Փրկության միջազգային կոմիտե» ոչ կառավարական կազմակերպությունը կոչ է անում անմիջապես ձեռնարկել քայլեր Սիրիայում հումանիտար ճգնաժամը լուծելու համար: Այդ երկրից փախստականների թիվը գերազանցում է 600 հազարը:

Միջազգային կազմակերպությունը խոսում է Սիրիայում «Զարհուրելի մակարդակի հասած բռնության» և սեռական բնույթ կրող հանցագործությունների մասին: ՄԱԿ-ի գնահատականներով կոնֆլիկտի սկզբից` 2011թ. մարտից երկրում սպանվել է 60 հազար մարդ: Բացի նրանք, ովքեր հեռացել են Սիրիայից, ամենապակասը ևս 2 մլն մարդ ստիպված են եղել լքել իրենց տները:

Փրկության միջազգային կոմիտեի պնդմամբ փախստականների մեծ մասը երկիրը լքում են բռնաբարված լինելու մշտական վտանգից խուսափելու համար: Այդ հանցագործությունները հաճախ կատարվում են զոհի ընտանիքի անդամների ներկայությամբ: Հենց այս հանգամանքն էլ BBC-ի փոխանցմամբ պատերազմի գլխավոր բնութագրական գիծն է համարվում:

Փրկության միջազգային կոմիտեն կտրուկ քննադատում է նաև «զոհերին տրամադրվող բժշկական և հոգեբանական օժանդակության տագնապահարույց անբավարար մակարդակը»:

Երկրի ամբողջական շրջաններ վերածվել են ավերակների և մարդիկ անընդհատ մոտեցող ճակատային գծի հետևանքով ստիպված են տեղափոխվել մեկից մեկ ուրիշ վայր: Բացի այդ տարածաշրջանում աննախադեպ ցուրտ եղանակներ են` ձյուն է տեղացել, ջերմաստիճանը ցույց է տալիս ռեկորդային ցածր ջերմաստիճան: Փախստականների ապրելու պայմանները գործնականում անտանելի են:

Լրատվական գործակալությունը հայտնում է, որ սիրիացի փախստական երեխաների մեջ, ովքեր ապրում են Լիբանանի ճամբարներից մեկում, չկա մեկը, որ ունենա ձմեռային հագուստ: «Բոլորը դողում և հազում էին ցրտի մեջ: Շատ երեխաներ, նույնիսկ, կոշիկներ չունեն»:

Անցյալ շաբաթ ՄԱԿ-ը հաղորդեց, որ 1 մլն սիրիացիներ քաղցի մեջ են: Համաշխարհային պարենային ծրագրի փորձագետների տվյալներով օգնությունը հասնում է 1,5 միլիոն մարդու:

Սակայն շարունակվող կռիվները և սննդամթերք առաքելու նպատակով Տարտուսի նավահանգիստն օգտագործելու անհնարինությունը հասցրել են այն վիճակին, որ շատերին օգնությունը չի հասնում: