Փաստ ինֆո

«Մատաղիս»-ի գործով տուժող Ռոման Եղիազարյանի իրավահաջորդ, նրա մայրը՝ Գոհար Մելքոնյանը բողոք է ներկայացրել ՀՀ վերաքննիչ քրեական դատարան՝ ընդդեմ ՀՀ Շիրակի մարզի ընդհանուր իրավասության դատարանի 2012թ. դեկտեմբերի 18-ի արդարացման դատավճռի: Նա և տուժողի մյուս հարազատները՝ հորեղբայրն ու հորաքույրը, համոզված են, որ հանցագործությունը կատարել են տարբեր դատական ատյանների կողմից 15 տարվա, ցմահ ազատազրկման դատապարտված, ապա Վճռաբեկ դատարանի բեկանումից հետո հիշյալ առաջին ատյանի դատարանի կողմից արդարացված Ռազմիկ Սարգսյանը, Մուսա Սերոբյանը և Արայիկ Զալյանը: Տուժողի հորեղբայր Արթուր Եղիազարյանը լիովին կիսում է նախաքննական մարմնի դիրքորոշումը, որը մինչև վերջ պնդում էր մեղադրանքը:

Տուժողի հարազատը համոզված է նաև, որ նախաքննության ընթացքում մեղադրյալների նկատմամբ խոշտանգումներ չեն եղել, ուստի, մասնավորապես՝ այն ժամանակվա ՀՀ զինդատախազ Գագիկ Ջհանգիրյանի աշխատասենյակում Ռ.Սարգսյանի խոստովանական ցուցմունքները չէին կարող լինել խոշտանգումների հետևանք: Տեսագրությունից երևում է, ըստ նրա, որ Ռ.Սարգսյանի դեմքին բացակայում են խոշտանգումների հետքերը: Նա ԶԼՄ-ների ներկայացուցիչներին բաժանեց հարցաքննության տեսագրությունը, որն ի դեպ, նորություն չէ, միշտ էլ եղել է քրեական գործում:

Տուժողի հարազատները արդարություն են պահանջում ընդհուպ մինչև ՀՀ նախագահից և պահանջում դատապարտել արդարացվածներին:

8 տարվա վաղեմության գործով մյուս տուժողի՝ Հովսեփ Մկրտումյանի հարազատները հակառակ կարծիքի են, նրանք հիշյալ անձանց մեղավոր չեն համարել իրենց որդու մահվան մեջ և հայտարարել են, որ անմեղ մարդիկ չպետք է դատապարտվեն:

Շիրակի մարզի ընդհանուր իրավասության դատարանը՝ դատավոր Հ. Մովսեսյանի նախագահությամբ և դատավորներ Մ. Սարոյանի ու Ա. Խաչատրյանի մասնակցությամբ, դեկտեմբերի 18-ին Ռազմիկ Սարգսյանին, Մուսա Սերոբյանին ու Արայիկ Զալյանին անմեղ էր ճանաչել ու արդարացրել նրանց առաջադրված ՀՀ քրեական օրենսգրքի 112-րդ հոդվածի 2-րդ մասի 1-ին, 6-րդ և 14-րդ կետերով՝ երկու կամ ավելի անձանց նկատմամբ մի խումբ անձանց կամ կազմակերպված խմբի կողմից անզգուշությամբ տուժողների մահվանը հանգեցրած՝ դիտավորությամբ առողջությանը ծանր վնաս պատճառելու մեղադրանքում՝ կատարված հանցագործությանը նրանց մասնակցությունը ապացուցված չլինելու հիմքով:

Դատավճիռն օրինական ուժի մեջ մտնելուց հետո քրեական գործն՝ իրեղեն ապացույցների հետ միասին, պետք է ուղարկվի, ըստ դատավճռի, ՀՀ Զինվորական դատախազին՝ լուծելու նոր անձի նկատմամբ քրեական հետապնդում հարուցելու հարցը: