Փաստ ինֆո

Առաջիկա նախագահական ընտրությունների թեկնածուների մասնակի զտումն արդեն կատարված է, իսկ վերջնական զտումը պետք է կատարի ժողովուրդը և շատ կարևոր է, որ ժողովուրդն իսկապես ինքը կատարի այդ զտումը՝ առանց գայթակղությունների ու ճնշումների ենթարկվելու: Այս մասին «Փաստարկ» մամուլի ակումբում լրագրողների հետ հանդիպմանն այսօր հայտարարեց ՀՀ նախագահի ինքնաառաջադրված թեկնածու, «Ազգային ինքնորոշում միավորում» կուսակցության նախագահ Պարույր Հայրիկյանը:

Նա ընդգծեց, որ ժամանակին քաղաքական պայքարի մեջ մտնելու պահից ցայսօր իր ելակետային սկզբունքը մնում է ինքնորոշման սկզբունքը, այսինքն՝ հայ մարդը, ՀՀ քաղաքացին ինքնուրույնաբար պետք է տնօրինի իր ճակատագիրը՝ արդար, ազատ ընտրություններով:

Պ. Հայրիկյանն ընդգծեց, որ ՀՀ նախագահ է ուզում ընտրվել, որպեսզի բարոյա-քաղաքական լծակներն օգտագործելով, նախագահի դիրքերից, քաղաքական գործիչներին համոզելու ճանապարհով փոփոխություններ կատարի պետական համակարգում: Մասնավորապես, թեկնածուն նպատակ ունի Հայաստանում ներդնել «կատարյալ ժողովրդավարության համակարգ», նախապատրաստել և ամենաուշը 2 տարվա ընթացքում իրականացնել սահմանադրական բարեփոխումներ՝ հանրաքվեի միջոցով: Արդյունքում՝ Հայաստանում կլինեն ժողովրդի կողմից ընտրվող վարչապետի ընտրություններ և ԱԺ ընտրություններ՝ աշխարհում ամենաներկայացուցչական սկզբունքով՝ գուցե 100 տոկոսանոց համամասնական ընտրակարգով, վարկանիշային քվեարկության արդյունքում:

Իսկ նախագահի պաշտոնը Պարույր Հայրիկյանը խոստանում է վերացնել, իսկ նախագահական ապարատը պահելու վրա ծախսվող գումարը հատկացնել, ասենք, բնակարաններ կառուցելուն, ուսուցիչների, բժիշկների աշխատավարձերը բարձրացնելուն և այլն: Կկրճատվի նաև նախարարների, խորհրդարանականների թիվը:

Փոփոխություններ կատարելու արդյունքում Հայաստանի նախագահ դառնալու ձգտում ունեցող 35 տարեկան քաղաքացիները և ոչ միայն նրանք, ըստ Պ.Հայրիկյանի, իրենց կզգան ՀՀ նախագահներ: Հակադարձելով լրագրողի հարց դիտարկմանը էկզոտիկ թեկնածուների (էպոսագետ, կարատեիստ և այլք) մասին, Պ.Հայրիկյանը նկատեց. «Մի քանիսն առաջ են ընկել ժամանակից, իրենց նախագահ են զգում, թող զգան, եկեք սիրով վերաբերվենք նաև մարդկանց խենթություններին»:

Քաղաքական գործիչը չհամաձայնեց լրագրողի գնահատականի հետ, թե երկու տարով կառավարելու միտքը «փոխառված է» առաջին նախագահ Լևոն Տեր-Պետրոսյանից՝ վերջինս է իրենից շատ բաներ սովորել: Պ.Հայրիկյանը հիշեցրեց, որ դեռևս 1991 թ. նախագահական ընտրությունների շրջանում ինքը պատրաստվում էր երկու տարով նախագահ դառնալ՝ լուծելու համար երկրի համար կարևոր առանցքային խնդիրները՝ ընդունել Սահմանադրությունը, ստեղծել ազգային բանակն ու պետական համակարգը: