Փաստ ինֆո

Թերթը գրում է, որ դեռևս 2012թ. նոյեմբերին ՀՀ ոստիկանապետ Վլադիմիր Գասպարյանի ցուցումով ապօրինի ծառահատումների դեպքերի բացահայտմանն ուղղված միջոցառումներ սկսեցին իրականացվել, որոնց արդյունքում տավուշի մարզում 8 հոգու նկատմամբ քրեական գործ հարուցվեց, իսկ 88 անձ ենթարկվեց վարչական պատասխանատվության:

Սակայն ըստ բնապահպանների և քաղաքացիական ակտիվիստների` ոստիկանապետի քայլը թերևս անհրաժեշտ, բայց ոչ բավարար պայման է, քանի որ հենց սանիտարական հատման անվան տակ շատ հաճախ առողջ ծառեր են հատվում, իսկ վերահսկողական մեխանիզմ չկա:

«Հանուն կայուն մարդկային զարգացման» ասոցիացիայի նախագահ Կ. Դանիելյանի կարծիքով թեև ոստիկանապետի իրականացրած միջոցառումը` կապված ծառահատումների հետ, իմիտացիա չէ, բայց հիմնական մեղավորներն, ըստ նրա, օլիգարխներն են, ովքեր բիզնես են դարձրել մեր անտառանյութը և պետք է սկսել այդտեղից, այլ ոչ թե առանձին բնակիչներից, քանի որ հիմնական եկամուտը գնում է շատ ավելի կենտրոնացված վայրեր:

Իսկ ըստ էկոլոգիական դաշինքի համակարգող Ս. Ադամյանի` խնդիրն առավել կխորանա, քանի որ ապրիլից գազի գինը կբարձրանա: Նրա կարծիքով` անտառային ոլորտում շատ են բիզնես անողները և բնավ էլ մեղավորը սղոցարանների խեղճուկրակ մարդիկ չեն, որոնք հացի խնդիր են լուծում: Դրանք լուրջ անձինք են, որոնք կանգնած են այդ ամենի վերևում:

«Վովա Գասպարյանը փորձում է բռնել ներքևի մարդկանց, որոնք իրենցից ոչինչ չեն ներկայացնում»,- թերթի թղթակցի հետ զրույցում ասել է Ս. Ադամյանը: