Փաստ ինֆո

Թերթն անդրադարձել է անցած շաբաթվա ընթացքում հանրապետության տարբեր մարզերում արձանագրված արտակարգ պատահարներին:

Թերթը գրում է, որ Երևանում ինքնասպանության փորձերի և ինքնասպանությունների բազմաթիվ դեպքեր են արձանագրվել:

Այսպես` հունվարի 1-ին կանխվել է Կոտայքի մարզի Առինջ գյուղի բնակիչներից մեկի ինքնասպանության փորձը:

Հունվարի 2-ին կանխվել է Երևանի Մուշավան թաղամասի մի բնակչի, իսկ Ավանում`  25-ամյա մի աղջկա ինքնասպանության փորձը: Վերջինս ցանկացել է ցած նետվել շենքի 8-րդ հարկից:

Հունվարի 3-ին` ժամը 14:55-ին, Կիևյան կամրջի տակ հայտնաբերվել է Երևանի բնակիչ Տ. Պետրոսյանի դին:

Հունվարի 6-ին` ժամը 2-ի սահմաններում, ոստիկանության աշխատակիցները և փրկարարները կանխել են մի քաղաքացու ինքնասպանության փորձը, ով ցանկացել է ցած նետվել Կիևյան կամրջից:

Իսկ երեկ երեկոյան Կոտայքի մարզի Գեղարդ գյուղում կախվելու միջոցով ինքնասպան է եղել մի տղամարդ:

Թերթը նշում է նաև, որ տոնական օրերին գրանցվել են նաև թունավորման դեպքեր:

Այսպես` հունվարի 4-ին` ժամը 21:40-ի սահմաններում, թունավորումով հիվանդանոց են տեղափոխվել Գյումրի քաղաքում բնակվող Գևորգյանների ընտանիքի 3 անդամներ: Բժիշկները նրանց առողջական վիճակը գնահատել են միջին ծանրության:

Հունվարի 7-ին թունավորման դեպք է արձանագրվել նաև Երևանում. 30-ամյա կինը տեղափոխվել է «Արմենիա» բժշկական կենտրոն: Բժիշկները նրա վիճակը գնահատել են բավարար:

Հունվարի 6-ին Էջմիածին-Արմավիր մայրուղում տեղի ունեցած վթարի հետևանքով հիվանդանոց են տեղափոխվել 4 անձինք,  որոնցից երկուսը` երեխաներ: