Փաստ ինֆո

Դելիի իշխանությունները քայլեր են ձեռնարկում իրենց քաղաքը կանանց համար անվտանգ դարձնելու ուղղությամբ: Այդպիսի կանխարգելիչ միջոցառումների անհրաժեշտությունն առավել սուր դրվեց այն բանից հետո, երբ մի խումբ հանցագործների կողմից վերջերս բռնաբարված ուսանողուհին մահացավ:

Քաղաքային իշխանություններն, օրինակ, առաջարկում են, որպեսզի քաղաքում սահմանվի գիշերային պարեկության ժամ, ստուգվեն բոլոր հանրային տրանսպորտի միջոցների վարորդներն ու նրանց օգնականները, արգելվի ավտոբուսների պատուհանների մգեցումը կամ դրանք վարագույրով ծածկելը:

Իսկ Հնդկաստանի կառավարության որոշմամբ, Գերագույն դատարանի նախկին դատավորի ղեկավարությամբ ստեղծվել է մի հատուկ կոմիտե, որը պետք է զբաղվի սեռական բռնությունների դեմ պայքարի մասին երկրի օրենսդրության բարեփոխման խնդրով:

Բացի այդ, երկրի ՆԳ նախարար Սուշիլ Կումարի Շինդեն հայտարարել է, որ Դելիի 166 ոստիկանական բաժիններից յուրաքանչյուրում այսուհետ պետք է հերթապահեն կին ոստիկաններ: Ոստիկանները խոստովանում են, որ բռնության ենթարկված կանանց առաջին օգնություն կազմակերպելու հարցում տղամարդ ծառայողները հաճախ «դժվարություններ» են ունենում:

Բացի այդ, Դելիում բացվել է հատուկ կանանց օգնություն ցուցաբերելու համար նախատեսված թեժ գիծ, որի միջոցով վտանգավոր իրավիճակում հայտնված կանայք կարող են կապ հաստատել քաղաքի ոստիկանական բաժանմունքների հետ:

Այս միջոցառումները, սակայն, բոլորին չէ, որ բավարար են թվում: Շատերը գտնում են, որ մինչ այժմ կանայք Հնդկաստանում համարվում են երկրորդ կարգի մարդիկ, և նրանց պաշտպանությունը պահանջում է շատ ավելի խորքային փոփոխություններ, որոնք առնչվում են հասարակական հարաբերություններին և մշակույթին: Հարցի նկատմամբ այսպիսի մոտեցման կողմնակիցները գտնում են, որ խնդիրը պետք է իրականացվի համապատասխան օրենսդրության և իրավական դաշտի ձևավորման միջոցով:

Այսօր, ըստ պաշտոնական տեղեկատվության, յուրաքանչյուր 14 ժամը մեկ Դելիում գրանցվում է բռնաբարության դեպք:

Հիշեցնենք, որ այս թեմայի արծարծման համար պատճառ հանդիսացավ օրեր առաջ քաղաքային հասարակական տրանսպորտում հինգ տղամարդկանց կողմից մի ուսանողուհու բռնաբարության փաստը, որի հետևանքով բռնության զոհը մահացավ:

Հանցագործության մեջ մեղադրվողների պաշտպանությունից Հնդկաստանի փաստաբանների կոլեգիան հրաժարվել է: Նրանց կպաշտպանի դատարանի կողմից նշանակված փաստաբանը: Այս գործի ծավալն արդեն գերազանցել է հազար էջը: Այստեղ զետեղված են նաև բռնաբարության զոհ դարձած աղջկա ցուցմունքները, որոնք նա հասցրել է տալ մահից առաջ:

Այս գործով քննությունն արդեն թևակոխել է դատական փուլ: Ըստ BBC-ի այն կմեկնարկի այսօր` հունվարի 5-ին: