Փաստ ինֆո

Հանցագործությունը մարդկությանն ուղեկցել է առնվազն Կայենի ժամանակներից սկսած, և անկախ Ամանորին թերևս բոլորիս դրական սպասումներից, տարվա հենց առաջին օրը չհաջողվեց խուսափել արյունահեղությունից:

ՀՀ ոստիկանության տեղեկացմամբ, հունվարի 1-ին` ժամը 09:20-ին, «Էրեբունի» բժշկական կենտրոնից ոստիկանության Շենգավիթի բաժնում հաղորդում է ստացվել, որ մարմնական վնասվածքներով իրենց մոտ բուժօգնության է դիմել 1957 թ. ծնված Հուսիկ Ս.-ն՝ հայտարարելով, որ ինքն է իրեն վնասել՝ նյարդերը հանգստացնելու նպատակով: Ոստիկանները, սակայն, պարզել են, որ նույն օրը` ժամը 08:00-ին, տանը, վիճաբանության ժամանակ Հուսիկ Ս.-ին խոհանոցային դանակով հարվածել և վնասվածքները պատճառել է եղբորորդին` 1982 թ. ծնված Ավետիս Ս.-ն, ով ժամը 12.00-ին ներկայացել է բաժին: Հանցագործության գործիք դանակն առգրավված է: Հանգամանքները պարզվում են: Կատարվում է նախաքննություն:

Մեկ այլ դեպքում նույնպես տուժողը փորձել է թաքցնել իրականությունը` իր հետ կատարվածը ներկայացնելով ավտովթարի հետևանք, սակայն ոստիկանները կարճ ժամանակում պարզել են իրողությունը: Հունվարի 1-ին` ժամը 04:00-ին, թիվ 3 կլինիկական հիվանդանոցից ճանապարհային ոստիկանության հերթապահ մաս հաղորդում է ստացվել, որ այտոսկրաակնակապիճային կոտրվածքով իրենց մոտ բուժօգնության է տեղափոխվել 1989 թ. ծնված Միքայել Մ.-ն, իսկ գանգուղեղային տրավմայով, դաստակի կտրած վերքով և ականջի վնասվածքներով՝ 1990 թ. ծնված Ռուբեն Ս.-ն: Ըստ Միքայել Մ.-ի հայտարարության, վնասվածքներն ստացել են նույն օրը Կոմիտասի պողոտայի մոտակայքում, ավտովթարի հետևանքով: Ոստիկանության ծառայողների ձեռնարկած օպերատիվ-հետախուզական և քննչական միջոցառումների շնորհիվ պարզվել է, որ նշված անձինք մարմնական վնասվածքները ստացել են ոչ թե ավտովթարի հետևանքով, այլ նույն օրը` ժամը 02:30-ին, Իսահակյան փողոցում գտնվող ակումբներից մեկում տեղի ունեցած ծեծկռտուքի ժամանակ: Հանգամանքները պարզվում են, կատարվում է քննություն:

Հունվարի 2-ին` ժամը 17:35-ին ոստիկանության Երևան քաղաքի վարչության օպերատիվ կառավարման կենտրոն է զանգահարել մի քաղաքացի և հայտնել, որ Դավիթ-Բեկի փողոցի խաչմերուկում վիճաբանություն է: Նույն օրը` ժամը 18.00-ին ‹‹Սուրբ Գրիգոր Լուսավորիչ›› բժշկական կենտրոնից հաղորդում է ստացվել, որ ‹‹պոլիտրավմա›› ախտորոշմամբ իրենց մոտ բուժօգնության է դիմել 1958 թ. ծնված Ռոբերտ Ա.-ն և հայտնել, որ Ավետիսյան և Դավիթ-Բեկի փողոցների խաչմերուկում իրեն ծեծել են:  Հիվանդանոց մեկնած ոստիկաններին նա հաղորդում է տվել, որ ժամը 17:20-ին, նշված խաչմերուկում, ‹‹ԳԱԶ-3110›› մակնիշի ավտոմեքենայի վարորդի և երկու ուղևորների հետ երթևեկության առնչությամբ առաջացած վիճաբանության ժամանակ վերջիններս ձեռքերով և ոտքերով հարվածել են իրեն` մարմնի տարբեր մասերում պատճառելով վնասվածքներ: Ոստիկանները նույն օրը երեկոյան հայտնաբերել և բերման են ենթարկել Ռոբերտ Ա.-ին ծեծի ենթարկած անձանց: Նշանակվել է դատաբժշկական փորձաքննություն: Կատարվում է հետաքննություն:

2013 թ. սկզբին, ցավոք, չհաջողվեց խուսափել նաև մահացու ելքով ճանապարհատրանսպորտային պատահարներից:

Հունվարի 2-ին` ժամը 12:30-ի սահմաններում, 1963 թ. ծնված Հովհաննես Խաչատրյանի վարած «ԲՄՎ 520» մակնիշի  ավտոմեքենան Հրազդան-Հանքավան ճանապարհի 5-րդ կմ-ին բախվել է հանդիպակաց ընթացող, 1984 թ. ծնված Ավետիք Փանոսյանի վարած «ԳԱԶ-2410» մակնիշի ավտոմեքենային: Վթարի հետևանքով Հովհաննես Խաչատրյանը, ուղևորներ, 1988 թ. ծնված Հայկ Խաչատրյանը, 1965 թ. ծնված Անահիտ Բրսոյանը, և Ավետիք Փանոսյանի ուղևորներ՝ 1958 թ. ծնված Հրաչիկ Փանոսյանն ու նույն թվականին ծնված Գեղանուշ Առաքելյանը, տեղում մահացել են, իսկ Ավետիք Փանոսյանը մարմնական վնասվածքներով տեղափոխվել է «Հրազդան›› բժշկական կենտրոն: Կատարվում է քննություն:

Հունվարի 2-ին, ժամը 15:30-ին, 1960 թ. ծնված Վալերի Մելքոնյանը «Ռենո›› մակնիշի տաքսի ավտոմեքենայով Բաբաջանյան փողոցում բախվել է «Ռենո›› մակնիշի մեկ այլ ավտոմեքենայի, որից հետո դուրս գալով երթևեկելի մասից, բախվել է ծառի: Պատահարի հետևանքով Վալերի Մելքոնյանը «Մալաթիա›› բժշկական կենտրոն տեղափոխվելու ճանապարհին մահացել է: Կատարվում է քննություն: