Փաստ ինֆո

Հունվարի 2-ին հանրապետության տարբեր վարչական տարածքներում բռնկվել են հրդեհներ, կան մարդկային զոհեր:  Արտակարգ իրավիճակների նախարարության ինտերնետային էջի համաձայն, ժամը 11:36-ի դրությամբ ստացվել է 4 ահազանգ.



Հայտնաբերվել է դի` վառված տնակում

Հունվարի 2-ին` ժամը 10:25-ին, ահազանգ է ստացվել, որ Շիրակի մարզի Գյումրի քաղաքի Անտառավան 5-րդ թաղամասում` 21Ա շենքի մոտակայքում, այրևում է տնակ: Դեպքի վայր է մեկնել մեկ մարտական հաշվարկ: Պարզվել է, որ հրդեհը բռնկվել է 232/048 տնակում: Հրդեհը մեկուսացվել է ժամը` 11:05-ին: Տնակում հայտնաբերվել է 1935 թ. ծնված Ֆ. Սարգսյանի դին:

Այրվել է էլեկտրական հաշվիչ

Հունվարի 2-ին` ժամը 10:59-ին, ահազանգ է ստացվել, որ Երեւանի Կոմիտասի պողոտայի 51/1 շենքի մուտքում առկա է ծխապատ գոտի: Դեպքի վայր է մեկնել մեկ մարտական հաշվարկ: Հրդեհը մեկուսացվել է ժամը  11:13֊ին, մարվել` 11: 23-ին: Պարզվել է, որ վահանակում այրվել է 11 էլեկտրական  հաշվիչ:

Հրդեհ Գանձաքար գյուղում

Հունվարի 2-ին` ժամը 05:21-ին, ահազանգ է ստացվել, որ Տավուշի մարզի Գանձաքար գյուղում տուն է այրվում: Դեպքի վայր է մեկնել երկու մարտական հաշվարկ: Պարզվել է, որ հրդեհը բռնկվել է Տավուշի մարզի Գանձաքար գյուղի 24-րդ նրբանցքի թիվ 28 տան տանիքում: Հրդեհը մեկուսացվել է ժամը  06:11-ին, մարվել` 07:17-ին: Այրվել է Ա. Հակոբյանին պատկանող տան տանիքը (120 քմ) եւ խոհանոցը` գույքով (16 քմ):


Ճամբարակում տունն ամբողջությամբ այրվել է, տանտերը` նույնպես

Հունվարի 2-ին` ժամը 03:08-ին, տեղեկություն է ստացվել, որ հրդեհ է բռնկվել Գեղարքունիքի մարզի Ճամբարակ քաղաքի Ա.Խաչատրյան փողոցի թիվ 4 տանը: Դեպքի վայր է մեկնել երկու մարտական հաշվարկ:  Հրշեջ-փրկարարները տնից դուրս են բերել 85-ամյա Խաչատրյանի դին: Հրդեհը մեկուսացվել է ժամը  03:57-ին, մարվել` 08:50-ին: Խաչատրյանին պատկանող տունն ամբողջությամբ այրվել է:

Լուսանկարը` Արտակարգ իրավիճակների նախարարության