Փաստ ինֆո

«Գետափ» ռեստորանային համալիրի մոտ սատկած տարբեր ձկնատեսակներ հայտնաբերելու դեպքի առթիվ ՀՀ բնապահպանության նախարարության բնապահպանական պետական տեսչության Երևանի տարածքային բաժինը պաշտոնական հաղորդում է ներկայացրել ՀՀ ոստիկանության Երևան քաղաքի վարչություն՝ տեղեկացնելով, որ անհայտ անձի կողմից Հրազդան գետի ջրերը թունավոր նյութերով աղտոտելու հետևանքով դեկտեմբերի 26-ին «Գետափ» ռեստորանային համալիրից վերև և ներքև գտնվող գետի հոսքի ուղղությամբ, 1-ին կիլոմետրի հատվածում հայտնաբերվել է տարբեր ձկնատեսակների զանգվածային վնասման եղանակով ոչնչացված 852 ձուկ: Այս մասին այսօր տեղեկացանք ՀՀ ոստիկանության հասարակայնության հետ կապի և լրատվության վարչությունից, որտեղից հայտնեցին նաև, որ դեպքի հանգամանքները պարզվում են, կատարվում է հետաքննություն:

Իհարկե, «անխիղճ» կամ «անխիղճներ» ասելն այս դեպքում բավարար չէ, պետք է բացահայտել և օրենքի ամբողջ խստությամբ պատժել հանցագործին կամ հանցագործներին: Հոդվածի ենթավերնագրով արտահայտված մեր հարցադրումն էլ իզուր չէ, կա որոշակի նախադեպ կամ նախադեպեր, երբ հանցագործները նման դեպքերում չեն բացահայտվել ու խույս են տվել պատասխանատվությունից:

ՀՀ գյուղատնտեսության նախարարության սննդամթերքի անվտանգության պետական ծառայություն պետի մամուլի քարտուղար Բաբկեն Պիպոյանն, ի պատասխան մեր հարցի, հավաստեց, որ Հրազդան գետում հայտնաբերված սատկած ձկները ծառայության ենթակայության ներքո գտնվող լաբորատորիա չեն բերվել, և ծառայությունը դրանց հետ որևէ առնչություն չունի: Ավելի վաղ ՀՀ արտակարգ իրավիճակների նախարարությունը հաղորդել էր, որ Հրազդանում սատկած ձկների մասին տեղեկությունը փոխանցվել է ԱԻՆ ճգնաժամային կառավարման կենտրոնի հետ համագործակցող ՀՀ բնապահպանության, գյուղատնտեսության նախարարությունների պատասխանատու աշխատակիցներին և ՀՀ գյուղատնտեսության նախարարության սննդամթերքի անվտանգության պետական ծառայություն:

Ինչպես տեղեկացանք ՀՀ բնապահպանության նախարարության հասարակայնության հետ կապերի բաժնից, հիշյալ դեպքով զբաղվում է ՀՀ բնապահպանության նախարարության բնապահպանական պետական տեսչությունը, հետազոտման ենթակա նմուշներն ուղարկվել են նախարարության կենտրոնական լաբորատորիա, եթե ոչ ձկան, ապա ջրի լաբորատոր հետազոտության եզրակացությունը սպասվում է այսօր: Հիշյալ բաժնից միաժամանակ հայտնեցին, որ ոստիկանությունը տվյալ փաստի առթիվ քրեական գործ է հարուցել: Սակայն ՀՀ ոստիկանության հասարակայնության հետ կապի և լրատվության վարչությունից մեզ տեղեկացրին, որ քրեական գործ առայժմ հարուցված չէ, ոստիկանությունում փաստի առթիվ նյութեր են նախապատրաստվում:

Առայժմ դժվար է ասել թունավոր նյութերը Հրազդան գետ լցնելու նպատակը կամ պատճառը: Բացառված չէ, որ ինչ-որ մեկը կամ ոմանք թունավոր նյութեր լցնելով գետը, փորձել են որսագողությունն այդ միջոցով իրականացնել և մեծ քանակության ձկներ ձեռք բերելով, Ամանորից առաջ վաճառահանել ու «գոլ» խփել: Հնարավոր է նաև, որ ձկները սատկել են Հրազդան գետի ափերին և հարևանությամբ գտնվող տարբեր, այդ թվում նաև ապօրինի օբյեկտներից որևէ մեկի կողմից թունավոր նյութերն ինչ-ինչ պատճառներով գետը լցնելու հետևանքով: Այլ հարց է, թե ինչ կպարզի առաջիկա քննությունը, կամ ընդհանրապես կպարզի՞, թե ոչ: Մենք կհետևենք իրադարձությունների զարգացման հետագա ընթացքին և այդ մասին կտեղեկացնենք մեր ընթերցողներին:

Հեղինակ՝ Արթուր Հովհաննիսյան

Լուսանկարը՝ ԷկոԼուր-ից