Փաստ ինֆո

Թեև Հայաստանում պետական ամենատարբեր կառույցներ ախտահարված են կոռուպցիայով, բայց դրանց շարքերում կան նաև այնպիսիք, որտեղ նշված ախտահարումն ավելի խորքային ու համատարած բնույթ ունի: Դրանցում արմատացած կոռուպցիան բնականաբար տեղիք է տալիս հասարակական ավելի մեծ դժգոհության և, ինչպես ասում են, դանակը ոսկորին հասցնում:

Վերոնշյալ պետական մարմիններից մեկը մինչև վերջերս ՀՀ աշխատանքի և սոցիալական հարցերի նախարարության բժշկասոցիալական գործակալությունն էր` իր կառուցվածքային ստորաբաժանումներով ու տարածքային մարմիններով: Թեև անցյալ ժամանակով ենք ներկայացնում, բայց դեռ երաշխիք չունենք ու վստահ չենք, թե տվյալ ոլորտում կոռուպցիան այդքան արագորեն հաջողվել է հաղթահարել, հետևաբար չենք կարող բացառել, որ այդ ոլորտում դեռ հիմա էլ շարունակվում են արատավոր բարքերը: Բազմաթիվ անձինք, որոնք իսկապես իրավունք ունեն նշված գործակալությանը դիմել և հաշմանդամության կարգ ստանալ, հրաժարվել են այդ մտքից` պատկերացնելով, թե, առանց կաշառքի ինչ քաշքշոց է սպասվում նշված գործակալությունում: Թերևս ավելորդ է ասել, թե դրան դիմանալը հաշմանդամների մեծամասնության համար բավական դժվար է, եթե չասենք` անհնար:

ՀՀ կառավարությունն՝ իր 06.12.2012 թ. նիստում, ինչպես արդեն հայտնի է, ընդունել է չորս որոշում, որոնք, կառավարության պաշտոնական կայքի տեղեկացմամբ, ուղղված են սոցիալական, մասնավորապես, բժշկասոցիալական ոլորտի կոռուպցիոն ռիսկերի նվազեցմանը։ ՀՀ կառավարությունը հավատացնում կամ փորձում է հավատացնել, թե այս ամենի շնորհիվ հնարավոր կլինի խուսափել սուբյեկտիվ մոտեցումներից, ապահովել աշխատանքի առավել թափանցիկություն, ինչն իր հերթին թույլ կտա էականորեն նվազեցնել կոռուպցիոն ռիսկերը։ Ինչպես տեղեկացնում է կառավարության կայքը` «Վարչապետ Տիգրան Սարգսյանի դիտարկմամբ նշված խնդիրը հանրային մեծ հնչեղություն է ստացել։ Ուսումնասիրությունները ցույց են տվել, որ կոռուպցիոն ռիսկերը համատարած բնույթ ունեին։ Արձանագրելով այս իրողությունը` վարչապետը ՀՀ աշխատանքի և սոցիալական հարցերի նախարարից տեղեկացել է, թե ձեռնարկված միջոցները և այս որոշումները բավարար երաշխիքներ տալիս են արդյոք, որպեսզի այդ կոռուպցիոն երևույթներն իսպառ վերացվեն։ Նախարարը հավաստիացրել է, որ այս ընթացքում կատարված աշխատանքը բավական արդյունք է տվել››։

Նույն աղբյուրի փոխանցմամբ՝ սոցապնախարարը հավաստիացրել է, որ. «Այս որոշումների ընդունմամբ, հստակեցնելով իրավական մասը, մենք շատ ավելի մեծ քայլ արած կլինենք, որպեսզի նվազեցնենք սուբյեկտիվ մոտեցումները››։

Նախարարը նաև տեղեկացրել է, որ այս ընթացքում աշխատանքից ազատվել են հանձնաժողովների վեց նախագահներ, եղել են նաև իրենց դիմումով ազատվողներ, բժիշկ փորձագետներ։

Համեմատաբար թարմ դեպքերի հիման վրա տեղեկացնենք, որ հաշմանդամության կարգ տալու համար կաշառք պահանջելու փաստով կան նաև քրեական պատասխանատվության կանչված անձինք:

Մեղադրական եզրակացության համաձայն` Լաուրա Համբարձումյանն աշխատելով «Արմենիա» հանրապետական բժշկական կենտրոնի պոլիկլինիկայում որպես թերապևտ, նշված բժշկական հաստատություն հաշմանդամության կարգ ստանալու նպատակով դիմած Լևոն Ավետիսյանի կնոջը՝ Կարինե Հովհաննիսյանին 21.03.2012 թ. հայտնել է, որ Լ. Ավետիսյանին բժշկասոցիալական փորձաքննության հանձնաժողով ուղեգրելու հարցը լուծելու համար անհրաժեշտ է պոլիկլինիկայի բժշկական փորձաքննության հանձնաժողովի նախագահ Մարիետա Նահապետյանին տալ 20 000 ՀՀ դրամ: Նա Կ. Հովհաննիսյանի մոտ համոզելու եղանակով առաջացրել է հանցագործություն կատարելու դիտավորություն և վճռականություն, վերջինիս դրդել է ամուսնու օգտին գործողություններ կատարելու համար առևտրային կազմակերպության ծառայող Մ. Նահապետյանին տալ առևտրային կաշառք։

Մարիետա Նահապետյանին մեղադրանք է առաջադրվել այն բանի համար, որ նա հանդիսանալով «Արմենիա» հանրապետական բժշկական կենտրոնի պոլիկլինիկայի բժշկական փորձաքննության հանձնաժողովի նախագահ և իրականացնելով կառավարչական գործառույթներ, հաշմանդամության կարգ ստանալու նպատակով նշված բժշկական հաստատությունում հետազոտության ենթարկված Լեոն Ավետիսյանին բժշկասոցիալական փորձաքննության հանձնաժողով ուղեգրելու համար 2012 թ. մարտի 21-ին, ժամը 13:00-ի սահմաններում «Արմենիա» ՀԲԿ պոլիկլինիկայի 4-րդ հարկում գտնվող իր աշխատասենյակում վերջինիս կնոջից՝ Կարինե Հովհաննիսյանից ապօրինաբար ստացել է 20 000 ՀՀ դրամ։

Մեղադրանք է առաջադրվել նաև բժշկասոցիալական փորձաքննության հանձնաժողովի աշխատակցին: Համաձայն մեղադրական եզրակացության` Մաքրուհի Ռոստոմյանն աշխատելով Երևանի թիվ 1 բժշկասոցիալական փորձաքննության հանձնաժողովում որպես բուժքույր-վիճակագիր, հաշմանդամության կարգ ստանալու նպատակով նշված հանձնաժողով դիմած Լ. Ավետիսյանի կնոջը՝ Կ. Հովհաննիսյանին 28.03.2012թ. հայտնել է, որ Լ. Ավետիսյանին հաշմանդամության 2-րդ կարգ սահմանելու հարցը լուծելու համար անհրաժեշտ է Երևանի թիվ 1 բժշկասոցիալական փորձաքննության հանձնաժողովի նախագահ Դանիել Մանուկյանին տալ 20 000 ՀՀ դրամ։ Նա նույնպես համոզելու եղանակով Կ. Հովհաննիսյանի մոտ առաջացրել է հանցագործություն կատարելու դիտավորության և վճռականության, վերջինիս դրդել է ամուսնու օգտին գործողություններ կատարելու համար պաշտոնատար անձ հանդիսացող Դ. Մանուկյանին տալ կաշառք։

Արթուր Հովհաննիսյան