Փաստ ինֆո

Արդեն ութ ամիս է, ինչ Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում ընթանում է ԵՊԼՀ նախկին ռեկտոր Սուրեն Զոլյանի հայցադիմումի քննությունը` ուղղված ՀՀ ԿԳ նախարար Արմեն Աշոտյանի որոշման դեմ:

Թերթը միաժամանակ հիշեցնում է, որ ԿԳ նախարարի` 2012թ. ապրիլի 17-ի որոշմամբ «Երևանի Վ. Բրյուսովի անվան պետական լեզվաբանական համալսարան» ՊՈԱԿ-ի գործադիր մարմնի ղեկավար, ռեկտոր Սուրեն Զոլյանի լիազորությունները դադարեցվեցին: Այսօր տեղի կունենա վերջին դատավարությունը:

Չնայած այս ամենին` Ս. Զոլյանն իրեն նախկին ռեկտոր չի համարում, այլ գտնվում է ժամանակավոր հանգստի մեջ, բայց այն, ինչ կատարվեց, միայն իր խնդիրը չի համարում: Ըստ Զոլյանի` Հայաստանում պետք է վերականգնվի Սահմանադրությունը:

«Սահմանադրությամբ խախտվել են 83-րդ, 6-րդ, 39-րդ և մի շարք այլ հոդվածներ: Բացի այդ, ամբողջ դատավարության ընթացքը տեսագրվել է, իրենց հայցադիմումներին որևէ պատասխան չի տրվել: Ես մտածում էի` գուցե ինչ-որ բան թույլ եմ տվել, բայց հիմա բոլորը կարող են համոզվել, որ որևէ խախտում տեղի չի ունեցել, տեղի է ունեցել պատվերի կատարում` առանց խորանալու, որ ես կպաշտպանեմ իմ իրավունքները»,- ասել է Ս. Զոլյանը:

«Ժամանակ»-ի թղթակցի հարցին, թե ով էր այս հանաձնարարության պատվիրատուն, նա նշել է, որ ԿԳ նախարարությունը մինչ օրս բուհերում նման ստուգումներ չի իրականացրել, մինչ այդ էլ չի իրականացրել և մինչև նոյեմբերի 6-ն էլ չի իրականացրել, ինչը վկայում է որոշակի վերաբերմունքի մասին: