Փաստ ինֆո

Իսկ ավելի վաղ չէի՞ն նկատել     

ՀՀ պետական եկամուտների կոմիտեի օպերատիվ հետախուզության վարչության 12-րդ բաժնի աշխատակիցները բացահայտել են, որ Օրբելի բժշկական ուսումնարանը 10 տարի շարունակ առանց համապատասխան լիցենզավորման, ապագա բուժքույրեր, մանկաբարձներ, ատամնատեխնիկներ ու դիմահարդարներ է պատրաստել:

Թե ՀՀ կրթության և գիտության նախարարությունը, ինչպես նաև հարկային ծառայությունը 10 տարի շարունակ ինչպես չեն նկատել վերոնշյալ փաստը, կամ, ավելի ճիշտ, ինչպե՞ս կարող էին չնկատել, կարծում ենք, կռահեց ընթերցողներից երևի յուրաքանչյուրը: Բայց մենք դեռ չենք շտապի մեր հետևությունը ներկայացնել, կսկսենք մի փոքրիկ լրագրողական հետաքննություն ու, նախևառաջ, պաշտոնական հարցմամբ մեզ հետաքրքրող հարցերը կուղղենք նշված պետական մարմինների ղեկավարներին:

ՀՀ ՊԵԿ-ից տեղեկանում ենք նաև, որ նույն վարչության 9-րդ բաժնի աշխատակիցները Երևանում հայտնաբերել են ապօրինի գործող ատամնաբուժարան, որտեղ Գուրգեն Սարգիսովը չունենալով պետական գրանցում, համապատասխան լիցենզիա և հաշվառված չլինելով հարկային մարմիններում, ատամնաբուժական ծառայություն է մատուցելիս եղել Տերյան 57 հասցեում:
Ավելին. օպերատիվ հետախուզության վարչության 26-րդ բաժնի աշխատակիցներն իրացնելով օպերատիվ տեղեկությունները, Մասիս քաղաքում հայտնաբերել են ապօրինի գործող տոնավաճառ: Պատկերացնո՞ւմ եք` մի ողջ տոնավաճառ, այն էլ` ոչ թե ինչ-որ հեռավոր մարզում, այլ հենց մայրաքաղաքի քթի տակ:

Ուսումնասիրելով ձեռնարկատիրական գործունեության հանգամանքները, հիշյալ բաժնի աշխատակիցները բացահայտել են, որ Մասիսի բնակիչ Մհեր Ենգիբարյանը Դպրոցականների փողոց-9 հասցեում սեփականության իրավունքով իրեն պատկանող շուրջ 10 000 քմ մակերեսով տարածքում հարկային դաշտից դուրս ձեռնարկատիրական գործունեությամբ էր զբաղվում: Բացահայտվել է նաև, որ Ենգիբարյանն առանց պետական գրանցման ու համապատասխան լիցենզիայի, կազմակերպել է առևտրի իրականցման վայրի գործունեություն` վարձակալական հիմունքներով հարկային մարմնում հաշվառված առանձին տնտեսվարող սուբեկտների տրամադրելով շուրջ 40 առևտրային տարածք: Ստվերային այս տոնավաճառում իրականացվել է սննդամթերքի, տնտեսական ապրանքների և հագուստի առևտուր, վարձակալությամբ տրամադրվել են հարսանյաց պարագաներ, ինչպես նաև հաց թխվել: Իրականացված միջոցառումների արդյունքում պարզվել է, որ այդ ընթացքում առևտրային գործունեություն իրականացվող սուբյեկտներից Մհեր Ենգիբարյանը որպես վարձավճար ստացել է շուրջ 32 մլն  դրամ համախառն եկամուտ, ընդ որում, ոչ մի անգամ հարկերի հաշվարկ ու պետբյուջեին վճարում չկատարելով:

Բնականաբար հարց է առաջանում` հարկայինի համապատասխան աշխատակիցները վերոնշյալ տոնավաճառն ու օրենքից դուրս նրա տևական աշխատանքն ավելի վաղ ինչպե՞ս կարող էին չնկատել: Իրոք դժվար է հավատալ, որ չեն նկատել, չէ՞ որ խոսքն ասեղի մասին չէ, այլ շուրջ 10 000 քմ մակերեսով տարածքում ձեռնարկատիրական գործունեության ծավալման:  Բոլոր դեպքերում, այս և մյուս դեպքերի առնչությամբ առաջացած հարցերի պատասխանը պարզելու և հանրությանը ներկայացնելու համար ՊԵԿ-ի նախագահը, կարծում ենք, պարտավոր է ծառայողական քննություն նշանակել, եթե, իհարկե, արդեն չի նշանակել:

Հեղինակ` Արթուր Հովհաննիսյան