Փաստ ինֆո

Մամոնային պաշտող և փողից կուրացած անձինք են միայն, որ չեն խորշում «թրաֆիքինգ» կոչված բիզնեսից` մարդկանց սեռական կամ աշխատանքային շահագործումից: Դժվար է ասել, թե այս քրեական գործի նյութերում որքան լուռ ու չվերծանված ապրումներ կան: Դա միայն Արմինեին է հայտնի (անունը փոխված է), ով, չնայած անչափահաս լինելուն, աննկարագրելի մաքառմամբ կարողացել է հայրական տանից հեռու, օտարության մեջ պահել իր պատիվը և, ինչպես երևում է հիշյալ գործից, համառորեն հրաժարվելով չտրվել սեռական շահագործման:

Երևանի բնակիչ, 1989 թ. ծնված Ռաֆիկ Մարկոսյանին առաջադրված մեղադրանքի համաձայն` վերջինս 2011թ. հուլիսին անչափահասներ Արմինեին և Կարինեին (անունները փոխված են) սեռական շահագործման նպատակով հավաքագրելու, Հայաստանից Ռուսաստանի Դաշնության նրանց տեղափոխումը կազմակերպելու և այնտեղ նրանց շահագործման նպատակով պոռնկության մեջ ընդգրկելու դիտավորությամբ նախնական համաձայնության է եկել իր հետ սիրային կապի մեջ գտնվող Մարինեի (անունը փոխված է) հետ:

Ըստ գործի տվյալների, Արմինեի հետ ամուսնանալու, նրան ՌԴ Վոլգոգրադ քաղաք` իր ծնողների մոտ մշտական բնակության տեղափոխելու, այնտեղ ընտանեկան բարեկեցիկ կյանքով ապրելու կեղծ խոստումներով Ռաֆիկ Մարկոսյանը, որպես այդ խոստումների հավաստիք, իր հանցակից Մարինեին Արմինեի հարազատների և մտերիմների շրջանում իբրև իր մորաքրոջ աղջիկ ներկայացնելու միջոցով վերջիններիս վստահությունը չարաշահելով, հավաքագրել է նրան։

Դարձյալ սեռական շահագործման նպատակով, միաժամանակ ՌԴ Վոլգոգրադ քաղաք տեղափոխելու և իրենց հետ համատեղ բարեկեցիկ կյանքով ապրելու կեղծ խոստումներով, նրանք փորձել են հավաքագրել նաև Արմինեի ընկերուհուն՝ Կարինեին, սակայն, ըստ մեղադրական եզրակացության, չեն կարողացել հանցավոր մտադրությունն ավարտին հասցնել իրենց կամքից անկախ պատճառով, քանի որ Կարինեն հրաժարվել է մեկնել Ռուսաստան:

Նախնական քննության տվյալներով` Ռ.Մարկոսյանը Մարինեի հետ միասին, Արմինեին Բագրատաշենի սահմանային անցակետով 2011թ. հուլիսի 10-ին տեղափոխել են ՌԴ Մինվոդի քաղաք, որտեղ վերջինիս փախուստը կանխելու նպատակով վերցրել են նրա անձնագիրը: Այստեղ բռնություն գործադրելով` ծեծի ենթարկելով և այդպիսիք գործադրելու սպառնալիքներով, փորձել են Արմինեին ներգրավել պոռնկության շահագործման մեջ` ստիպելով զբաղվել մարմնավաճառությամբ և աշխատած գումարները փոխանցել իրենց: Սակայն տեսնելով, որ վերջինս համառորեն հրաժարվում է, նրան ներգրավել են այլ շահագործման` հարկադիր աշխատանքի մեջ: Մասնավորապես` 2011թ. հուլիսի 12-ից մինչև հուլիսի 28-ն աշխատանքային շահագործման են ենթարկել` պարտադրելով Մինվոդի քաղաքին հարակից Նագուտսայա գյուղում գբաղվել հողագործությամբ։

Մեղադրական եզրակացության համաձայն` Ռաֆիկ Մարկոսյանը կատարել է հանցավոր արարքներ, որոնք նախատեսված են ՀՀ քրեական օրենսգրքի 34-132.2-րդ հոդվածի 2-րդ մասի 1-ին, 2-րդ, 7-րդ կետերով և 132.2-րդ հոդվածի 2-րդ մասի 2-րդ, 4-րդ և 7-րդ կետերով։ Նա այս տարվա հունիսից կալանավորված է, այժմ` «Նուբարաշեն» քրեակատարողական հիմնարկի կալանավոր: Երևանի Շենգավիթ վարչական շրջանի ընդհանուր իրավասության դատարանում, դատավոր Ալեքսանդր Ազարյանի նախագահությամբ այժմ քննվող սույն քր. գործով հերթական դատական նիստը նշանակվել է դեկտեմբերի 27-ին: